Sevinc Vaqifqızının Şikayəti Təmin Edilmədi
Sentyabrın 3-də Sabunçu Rayon Məhkəməsində “Abzas Media”nın baş redaktoru Sevinc Vaqifqızının Bakı İstintaq Təcridxanasındakı saxlanma şəraiti ilə bağlı şikayətinə baxılıb. Hakim Teymur Həsənovun sədrliyi ilə keçirilən prosesdə jurnalistin vəsatəti təmin edilməyib.
Məhkəmədə Vaqifqızı məhbusların saxlandığı otaqların dar, havasız olduğunu, suyun fasilələrlə verildiyini, qışda istilik, yayda isə soyutma sistemlərinin işləmədiyini bildirib. O, gün ərzində cəmi 2 saat soyuq su, həftədə iki dəfə isə məhdud müddətdə isti su verildiyini vurğulayıb. Avropa penitensiar qaydalarına görə, hər adama 7 kvadrat metr ərazi düşməli olduğu halda, Bakı İstintaq Təcridxanasında bu rəqəmin 4 kvadrat metrdən az olduğunu deyib.
Təzyiq və Diskriminasiya İddiaları
Sevinc Vaqifqızı digər jurnalistlərlə aclıq aksiyası keçirdiyi dövrdə qeyri-insani şəraitdə saxlandığını və pis rəftara məruz qaldığını söyləyib. O, aclıq dövründə həşəratlarla dolu otağa salındığını, duş sisteminin, televizorun işləmədiyini və sırf təzyiq məqsədilə paltarlarının, dərmanlarının ona verilmədiyini qeyd edib. Bu halların Bakı İstintaq Təcridxanasındakı vəziyyəti əks etdirdiyini bildirib.
Jurnalist ailəsinin gətirdiyi ventilyatorun təcridxana rəhbərliyi tərəfindən verilməsinə icazə verilmədiyini də xatırladıb. Onun sözlərinə görə, rəis ventilyatoru vermək üçün “yazıları sil, sonra verərəm” şərtini qoyub ki, bu da onun jurnalist fəaliyyəti ilə bağlı təzyiq olduğunu göstərir. Vaqifqızı hamıya ventilyator verildiyi halda, ona verilməməsini ayrıseçkilik adlandırıb və qanun qarşısında bərabərlik prinsipinin pozulduğunu vurğulayıb.
Təcridxana Nümayəndəsinin İddiaları Təkzib Edildi
Məhkəmədə qarşı tərəfi təmsil edən Bakı İstintaq Təcridxanasının təlim-tərbiyə şöbəsinin müdiri Şamil Süleymanov jurnalistin bütün iddialarını təkzib edib. O, suyun daimi verildiyini və müəssisənin hər məhbusa ventilyator verdiyini söyləyib.
Jurnalist təcridxana nümayəndəsinin bu iddialarına cavab olaraq yerində baxış keçirilməsi və şikayətlərinin araşdırılması üçün vəsatət verib. Hakim Teymur Həsənov Süleymanovdan vəsatətə münasibətini soruşduqda, o, yerində baxışa ehtiyac olmadığını qeyd edib. Sevinc Vaqifqızı isə “Əgər hər şey dediyiniz kimi qaydasındadırsa, niyə yerində baxışa tərəddüd edirsiniz? Əgər düz danışmıramsa, gəlib yoxlasınlar” deyərək, iddialarının doğruluğunu sübut etməyə hazır olduğunu bildirib.
Vaqifqızı Şamil Süleymanovun onun telefon danışığına qadağa ilə bağlı məhkəməsində də qarşı tərəfin nümayəndəsi qismində iştirak etdiyini xatırladıb. O, təcridxana rəisinin (Elnur İsmayılov) işçilərinin “düyməyə bağlı” insanlar olduğunu və onlara nə tapşırılsa, onu deyəcəklərini bildirdiyini qeyd edib.
Genişmiqyaslı Problemlər və Təzyiq Mekanizmləri
Jurnalist şikayətini təkcə öz adından deyil, Bakı İstintaq Təcridxanasındakı digər 147 qadın məhbusun adından etdiyini söyləyib, çünki eyni problemlərlə onlar da üzləşir. Ümumilikdə isə təcridxanadakı şəraitsizlikdən 4300-dək məhbus əziyyət çəkir.
Vaqifqızı qeyd edib ki, digər məhbuslar şikayət etdikdə təzyiqlə üzləşirlər, bu səbəbdən o, onların da səsini çatdırmaq üçün buradadır. O, Ombudsmanla konfidensial olmalı olan şikayətlərinin rəis tərəfindən müzakirə edildiyini və bunun digər məhbuslar üçün təhlükə yaratdığını vurğulayıb. Sevinc Vaqifqızı özünün də dəfələrlə şikayət etdiyi üçün telefon danışıqlarının kəsildiyini bildirib.
Təcridxana rəhbərliyinin telefon danışıqları kəsiləndə digər məhbusları “Abzas”çılara qarşı təhrik etməyə çalışdığını da əlavə edib. O, “Ailənizlə onlara görə əlaqə saxlaya bilmirsiniz” deyərək məhbusları qarşı-qarşıya qoyduqlarını ifadə edib. Jurnalist hakim Teymur Həsənova müraciət edərək qərar verəndə təkcə onunla bağlı deyil, həm də digər 4300 məhbusun insan hüquqları ilə bağlı qərar verəcəyini xatırladıb.
“Abzas Media” Jurnalistlərinə Verilən Hökm
Xatırladaq ki, iyunun 20-də Bakı Ağır Cinayətlər Məhkəməsində “Abzas Media işi” üzrə təqsirləndirilən şəxslərə hökm oxunub. Məhkəmənin qərarı ilə “Abzas Media”nın direktoru Ülvi Həsənli, baş redaktor Sevinc Vaqifqızı, araşdırmaçı jurnalist Hafiz Babalı və “Azadlıq Radiosu”nun jurnalisti, iqtisadçı Fərid Mehralızadə 9 il, jurnalistlər Nərgiz Absalamova və Elnarə Qasımova 8 il, “Abzas Media”nın koordinatoru Məhəmməd Kekalov isə 7 il 6 ay azadlıqdan məhrum ediliblər.
Onlar qaçaqmalçılıq da daxil olmaqla bir neçə maddədə ittiham olunublar. Lakin jurnalistlər və müdafiəçiləri istintaqın tutarlı sübutlar ortaya qoymadığını bildiriblər.
Leave a Reply