Papa Livandan ayrılır: Hücum və düşmənçiliklər dayansın

Papa 14. Leo Beyrutdan Romaya Yola Düşdü

Üç günlük rəsmi səfərini başa vuran Papa 14. Leo, Lübnanın paytaxtı Beyrutda keçirdiyi görüşlərdən sonra İtaliyanın paytaxtı Romaya qayıtmaq üçün Rəfik Həriri Beynəlxalq Hava Limanına yola düşüb.

"Xalqımız Sülh və Sabitliyə Can Atır"

Lübnan Prezidenti Jozef Avn, Məclis Sədri Nəbih Berri və Baş nazir Nəvvaf Səlamın da iştirak etdiyi yolasalma mərasimində çıxış edərək, bu səfərin Lübnan xalqının yaddaşında silinməz iz buraxacağını bildirib. Prezident Avn, "Siz ölkəmizə ümid və sülh mesajları gətirdiniz. Müxtəlif bölgələrə səfərlərinizdə bütün ictimai təbəqələr tərəfindən böyük sevgi ilə qarşılandınız. Bu maraq xalqımızın sülh və sabitliyə dərin ehtiyacını nümayiş etdirir" deyə qeyd edib. O, 14. Leoya səfəri üçün təşəkkür edərək, "Lübnanlılarla görüşlərinizdə bu ölkəyə olan sevginizi və mesajınızın səmimiyyətini hiss etdik" sözlərini əlavə edib.

"Hücumlar və Düşmənçiliklər Sonlandırılmalıdır"

Öz növbəsində Roma Pontifiki Papa 14. Leo, Lübnanda xoş vaxt keçirdiyini və ayrılmağın onun üçün çətin olduğunu bildirərək deyib: "Biz bir-birimizdən ayrılmırıq, əksinə, tanış olaraq birgə irəliləməyə davam edəcəyik. Ümid edirik ki, bu qardaşlıq və sülhə bağlılıq ruhuna hazırda özlərini düşmən hesab edənlər də daxil olmaqla, bütün Yaxın Şərq daxil olacaq." O, Beyrut Limanındakı partlayış yerinə etdiyi səfərin onu dərindən təsirləndirdiyini vurğulayıb və 4 avqust 2020-ci ildə baş verən bu faciədə həyatını itirənlər üçün dua etdiyini bildirib.

Ölkənin cənubunda hazırkı "gərginlik və qeyri-sabitlik" vəziyyətinə toxunan 14. Leo, "Hücumlar və düşmənçiliklər sona yetsin. Silahlı mübarizənin artıq heç bir fayda vermədiyini qəbul etməliyik. Silahlar öldürür, halbuki müzakirə, vasitəçilik və dialoq konstruktivdir. Sülhü yalnız bir məqsəd olaraq deyil, həm də bir yol olaraq seçək," deyə çağırış edib.

Çıxışlardan sonra Pontifiki və onu müşayiət edən heyəti daşıyan təyyarə Beyrut Hava Limanından ayrılıb. Vatikan dövlət başçısı 14. Leo, Türkiyə səfərindən sonra 30 noyabrda Lübnana keçərək rəsmi təmaslarda olmuşdu.

24 saat