Tramp: Avropa Ukraynaya mühüm təhlükəsizlik zəmanətləri təmin edəcək

ABŞ prezidenti Donald Tramp Oval Ofisdə keçirdiyi və prezident fərmanlarını imzaladığı mərasimdə media nümayəndələrinə mühüm açıqlamalar verib. O, Rusiya-Ukrayna müharibəsində sülh prosesi ilə bağlı mövqeyini ifadə edib. Tramp Rusiya-Ukrayna müharibəsinin tezliklə başa çatmasını arzuladığını, prosesin davam etdiyini, lakin hələ də həllini tapmalı olan bir sıra əhəmiyyətli məsələlərin mövcudluğunu bildirib. O, beynəlxalq ictimaiyyətin bu münaqişəyə son qoymaq üçün səylərini artırmalı olduğunu vurğulayıb. ABŞ prezidenti hazırda ən aktual mövzunun Ukraynaya veriləcək təhlükəsizlik təminatları olduğunu qeyd edib. O, bu təminatların konkret təfərrüatlarının hələ müzakirə edilmədiyini bildirib: "Təhlükəsizlik təminatlarının tam olaraq nədən ibarət olacağını bilmirik, çünki bu barədə hələ müzakirələr aparmamışıq. Avropa onlara mühüm təhlükəsizlik təminatları verəcək. Biz də onlara kömək etmək üçün prosesə qoşulacağıq." Tramp həmçinin Rusiya prezidenti Vladimir Putinlə bu yaxınlarda görüşdüyünü də dilə gətirib. O əlavə edib ki, bu görüşdən sonra Rusiyanın Kiyevə hücum təşkil etməsi onu çox qəzəbləndirib. Onun sözlərinə görə, bu cür hərəkətlər sülh səylərinə ciddi ziyan vurur. Donald Tramp Putin və Ukrayna prezidenti Volodimir Zelenskinin niyə hələ də görüşməməsi ilə bağlı suala konkret cavab verib: "Çünki onlar bir-birlərini bəyənmirlər." ABŞ-ın artıq Ukraynaya birbaşa pul ayırmadığını vurğulayan Tramp, Co Bayden dövründə bu ölkəyə təxminən 350 milyard dollar vəsait göndərildiyini iddia edərək, hazırda prosesin bu şəkildə getmədiyini bildirib. O, maliyyə dəstəyi siyasətinin dəyişdiyini vurğulayıb. Tramp ABŞ-ın NATO ilə əməkdaşlıq etdiyini, lakin Ukrayna ilə birbaşa iş görmədiyini izah edib: "Biz NATO ilə əməkdaşlıq edirik, Ukrayna ilə yox. NATO raketlər, xüsusən də Patriot raketləri istəyir. Biz raketləri NATO-ya veririk. NATO da bizə ödəniş edir. Ukraynaya heç bir vəsait ayırmırıq." Donald Tramp Putindən əlavə, nüvə silahlarının məhdudlaşdırılması mövzusunu da müzakirə etdiyini bildirib. O qeyd edib ki, "Ən çox nüvə silahı bizdə, sonra Rusiyada, daha sonra isə Çində var. Çin hələ çox geridədir, lakin beş ildən sonra bizi keçəcək." Bu, qlobal təhlükəsizlik üçün narahatlıq doğuran bir məqamdır.

Şimali Koreya lideri Kim Çen Inla münasibətlər

Digər tərəfdən, ABŞ prezidenti Tramp Putindən əlavə, Şimali Koreya lideri Kim Çen Inla da yaxşı münasibətləri olduğunu dilə gətirib. Bu münasibətlərin bölgədəki gərginliyi azaltmağa kömək edə biləcəyinə işarə edib. Tramp deyib: "Şimali Kore ilə çox yaxşı münasibətlərim var. Əslində, bir gün onunla görüşəcəyəm. İki dəfə görüşdük, iki zirvə keçirdik. Çox yaxşı razılaşdıq." O, sözlərini belə yekunlaşdırıb: "Onu demək olar ki, bacısından başqa hər kəsdən daha yaxşı tanıyıram. Bilirsiniz, onu çox sevdiyimi deməməliyəm, çünki bunu etsəm, yalançı xəbər mediası məni məhv edər. Amma onunla çox yaxşı yola getdim və heç bir problem yaşamadıq."

24 saat