Siyasi Aldatma Kampaniyası
Ötən cümə axşamı günorta Ağ Evin mətbuat katibi Karoline Leavitt birbaşa ABŞ prezidentindən gəldiyini söylədiyi bir mesajı oxuyaraq, dövlət başçısının hücumla bağlı iki həftə ərzində qərar verəcəyini bildirdi. The New York Times-ın təhlilinə əsasən, ABŞ prezidenti Donald Trampın İranla bağlı "iki həftə ərzində qərar verəcəyi" bəyanatı, genişmiqyaslı siyasi və hərbi dezinformasiya kampaniyasının tərkib hissəsi idi.
Cümə günü günorta ABŞ prezidenti Donald Tramp yay aylarını keçirdiyi Nyu-Cersi ştatının Bedminster şəhərindəki klubunda təşkil olunan ianə yığımı tədbirinə qatılmaq üçün Ağ Evdən ayrıldı. Bu addım, hər hansı bir hərbi əməliyyatın yaxınlaşmadığı təəssüratını daha da gücləndirdi.
Gözlənilməz Əməliyyat Əmri
Lakin bir neçə saat sonra, cümə günü ABŞ-ın yerli vaxtı ilə təxminən saat 17:00-da ABŞ prezidenti Donald Tramp ordusuna İrana qarşı hərbi əməliyyata başlama əmri verdi. ABŞ-ın Missuridən İrana B-2 tipli təyyarələrinin uçuşunun 18 saat çəkəcəyini nəzərə alsaq, Trampın qərarından imtina etmək üçün hələ saatları var idi. The New York Times qəzetinin yazdığına görə, Donald Tramp 2019-cu ildə də İran hədəflərinə hava zərbələri endirmək əmri vermiş, lakin son anda bunu ləğv etmişdi.
Hərbi Əməliyyatın Sirri
Məlumatlara görə, mürəkkəb və yüksək səviyyədə sinxronlaşdırılmış hərbi əməliyyat başladı. B-2 tipli təyyarələrdən ibarət iki dəstə əks istiqamətlərə havaya qalxdıqdan saatlar sonra, İrana doğru uçan bombardmançı təyyarələr döyüş təyyarələri ilə birləşərək İran hava məkanına daxil oldular. Bu zaman mətbuata yansıyan məlumatlara əsasən, Sakit okean istiqamətinə yönələn təyyarələrin transponderləri açıq idi və yerləri görünürdü, lakin Yaxın Şərqə, yəni İrana qarşı əməliyyata uçanların transponderləri bağlı idi.
Nüvə Obyektlərinə Zərbə
Amerika sualtı qayıqları Nətənz və İsfahandakı nüvə obyektlərinə 30 ədəd "Tomahawk" qanadlı raketi atdı. Bazar günü səhər İran vaxtı ilə 02:10-da, qabaqcıl bombardmançı təyyarə dağın altında yerləşən və yüzlərlə metr qalınlığında betonla mühafizə olunan Fordo obyektinə iki GBU-57 MOB bombası buraxdı. Əməliyyat başa çatdıqda cəmi 14 ‘sığınacaqdağıdan’ bomba istifadə edilmişdi ki, bu da həmin bombaların müharibədə ilk dəfə tətbiqi idi.
Pentaqondan Rəsmi Açıqlama
Pentaqon rəsmiləri bazar günü verdikləri açıqlamada, Amerika bombardmançı və döyüş təyyarələrinin heç bir düşmən atəşi ilə üzləşmədiyini bildirdilər. Amerika təyyarələri İran hava məkanını tərk etdikdən bir neçə saat sonra, ABŞ prezidenti Donald Tramp Ağ Evdə zəfərlə dolu çıxış edərək, əməliyyatın İranın nüvə potensialını "tamamilə və bütövlüklə məhv etdiyini" söylədi. Lakin bazar günü günorta, Amerika rəsmiləri əvvəlki gecədəki nikbinliyi yumşaldaraq, İranın nüvə obyektlərinin ciddi şəkildə zədələnə biləcəyini, ancaq tamamilə məhv edilmədiyini ifadə etdilər.
Bir cavab yazın