Qəzzada Atəşkəs və Türkiyənin Həlledici Rolu
İsrailin aparıcı qəzetlərindən “Maariv” Qəzzadakı atəşkəs prosesi ilə bağlı maraqlı təhlil yayımlayıb. Təhlildə Türkiyənin bu gün ev sahibliyi edəcəyi toplantının “kritik əhəmiyyətə malik olduğu” və İsrail Baş naziri Benyamin Netanyahunu “çətin vəziyyətə salacağı” vurğulanıb.
Gözlər İstanbul Toplantısındadır
Qəzzada atəşkəsin kövrək bir tarazlıqda davam etdiyi bu dövrdə gözlər yenidən Ankaranın diplomatiya fəaliyyətlərinə yönəlib. Xarici İşlər naziri Hakan Fidan bu gün İstanbulda “Qəzza” mövzusunda yüksək səviyyəli görüşə ev sahibliyi edəcək. Görüşün, ABŞ prezidenti Donald Trampla 2025-ci il sentyabrın 23-də Nyu Yorkda, Birləşmiş Millətlər Təşkilatının 80-ci Baş Assambleyası çərçivəsində bir araya gələcək ölkələrin xarici işlər nazirlərini yenidən toplayacağı gözlənilir.
Altı Ölkənin İştirakı və Gündəlik
Türkiyə, Birləşmiş Ərəb Əmirlikləri, İndoneziya, Qətər, Pakistan, Səudiyyə Ərəbistanı və İordaniya xarici işlər nazirlərinin qatılacağı toplantıda həm Qəzzadakı son hadisələr, həm də atəşkəsin gələcəyi müzakirə ediləcək. Görüşdə humanitar yardım dəhlizlərinin təhlükəsiz şəkildə açıq saxlanılması, beynəlxalq sabitlik qüvvəsinin yaradılması və Fələstində yeni idarəetmə strukturuna keçid yolları müzakirə olunacaq.
Maariv: Ankara ABŞ-a Təzyiq Edir
“Maariv” Türkiyənin bu prosesdəki rolunu “həlledici” kimi qiymətləndirərək, Ankaranın Vaşinqton üzərindəki diplomatiya təsirinə də diqqət çəkib. Xəbərdə qeyd olunub ki, İstanbuldakı zirvə ABŞ-ı İsrail hökumətinə müqavilənin ikinci mərhələsini həyata keçirmək üçün daha çox təzyiq göstərməyə təşviq edəcək. İsrail qəzetinin yazdığına görə, Ankaranın vasitəçilik fəaliyyətləri təkcə Qəzza atəşkəsi ilə məhdudlaşmır, eyni zamanda bölgədəki qüvvələr balansını yenidən formalaşdıracaq strateji mövqe qurur.
Regional Sabitlikdə Türkiyənin Mərkəzi Rolu
Qəzetə açıqlama verən regional mənbələr Ankaranın “balanslaşdırıcı” rolunun, xüsusilə Ərəb-İslam təmas qrupundakı ölkələr tərəfindən yüksək qiymətləndirildiyini vurğulayıb. “Maariv” “Xarici İşlər naziri Hakan Fidanın diplomatik səyləri Türkiyəni yenidən regional sabitliyin mərkəzinə daşıdı” ifadələrinə yer verib.
Netanyahunun Müqaviməti və Ankaranın Diplomatiya Masası
İsrail mətbuatında geniş əks-səda doğuran təhlildə Netanyahunun xüsusilə beynəlxalq sabitlik qüvvəsi planında Türkiyə təhlükəsizlik qüvvələrinə rol verilməsinə qarşı çıxdığı bir daha xatırladılıb. “Maariv” yazıb ki, Vaşinqton administrasiyası bu məsələdə İsrailin mövqeyini qismən dəstəkləsə də, ABŞ da Ankaranın aktiv rolunu göz ardı edə bilməz.
Diplomatik dairələrə görə Ankara diplomatiya masasında yeni bir balans yaratmaqda qərarlıdır. Xəbərdə sonda qeyd edilib ki, İstanbuldakı zirvə sadəcə bir “atəşkəs müzakirəsi” olmayacaq, eyni zamanda Türkiyənin regional vizyonunun da nümayiş olunduğu bir platformaya çevriləcək.
Leave a Reply