Ailə və Sosial Xidmətlər Nazirliyinin müraciəti əsasında, Ankara Növbətçi Sülh Cəza Məhkəməsi sözügedən mahnının “ictimai asayişə və ailə quruluşuna zidd” olduğu qərarı ilə ona çıxış qadağası qoyub. Bu qərardan sonra sosial media hesabında geniş açıqlama verən Matiz, sənətin əsl mahiyyətini vurğulayaraq, mahnı sözlərinin qəsdən təhrif edildiyini bildirib.
Məcazlarla Toxunmuş Sevgi Hekayəsi
Matiz açıqlamasında mahnının əslində xalq ədəbiyyatı ənənəsinə söykənən məcazlarla zəngin bir sevgi hekayəsindən bəhs etdiyini qeyd edib.
“Mənim yazı tərzimlə ortaya çıxan əsərlərdə hər kəs özünə dair mənalar tapa bilər. Sənətin cazibəsi də elə buradadır. Bu mahnıda keçən ‘təcrübəsiz ruh’, əslində ‘həyatdan dərsini almamış, gənc ruh’ mənasını daşıyır.”
Tanınmış sənətçi həmçinin, “quşun həm yuva quran, həm də göylərə uçan bir varlıq” olduğunu nümunə göstərərək mahnıdakı təsvirlərin gündəlik həyatın təbii hissələri olduğunu vurğulayıb.
Əsas Dərdimiz Başqa İkən…
Matiz gündəmin bir mahnıya kilidlənməsini də tənqid edib.
“Süfrədə bərəkət, küçədə əmin-amanlıq, insanda dürüstlük kimi gerçək problemlərimiz varkən, günlərdir mahnı sözlərim müzakirə olunur. Bu təhrif cəhdləri, sağlam düşüncəli birinin anlaya bilməyəcəyi dərəcədə qərəzlidir.”
İctimai Asayiş Bir Mahnıdan Sarsılmaz
Sənətçi, mahnının ictimai asayişi pozacaq gücdə olmadığını ifadə edərək aşağıdakı sözləri qeyd edib:
“İctimai asayişimizin və ümumi sağlamlığımızın bir mahnı ilə sarsılacaq qədər kövrək olmadığına inanmaq istəyirəm. Bu müddətdə zehni və qəlbi inciyən bütün sevənlərimə səmimi qəlbdən sarılıram.”
Leave a Reply