Heydər Əliyev Beynəlxalq Hava Limanında Taksi Xidmətlərinə Yeni Məhdudiyyətlər Tətbiq Edilib
Heydər Əliyev Beynəlxalq Hava Limanında mobil tətbiqlər vasitəsilə taksi sifariş etmək imkanları sentyabrın 10-dan etibarən məhdudlaşdırılıb. Sərnişinlər “Bolt” və “Yango” kimi tətbiqlərdən istifadə edərkən taksi xidmətlərini çağırmaqda çətinlik çəkdiklərini bildiriblər. Artıq hava limanı ərazisində sərnişinlər yalnız “Bolt” tətbiqində “Bolt Aeroport” seçimindən istifadə edə bilər və ya taksi dayanacağında mövcud olan “London taksiləri”nə üstünlük verə bilərlər. Bu taksilərin hava limanından şəhər mərkəzinə gediş haqqı 22-25 manat civarından başlayır.
Rəsmi Açıqlama: Keyfiyyət və Təhlükəsizlik Məsələsi
Heydər Əliyev Beynəlxalq Hava Limanı taksi xidmətlərinin məhdudlaşdırılacağını öncədən elan etmişdi. Açıqlamada əsas məqsədin sərnişinlərə “yüksəksəviyyəli xidmət” göstərmək olduğu vurğulanır. Bildirilib ki, bəzən sərnişinlər hava limanında rəsmi operatorların təqdim etdiyi müxtəlif kateqoriyalı seçimlərlə yanaşı, heç bir icazəsi olmayan, müvafiq təlim keçməyən və nəqliyyat vasitələri tələb olunan standartlara cavab verməyən şəxslərin israrlı şəkildə taksi xidmətləri təklif etməsi ilə qarşılaşırlar. Bu vəziyyət bəzi hallarda sərnişinlərin aldadılmasına və narazılıqlarına səbəb olur. Hava limanı ərazisindəki nizamsız və vahid sistemə uyğunlaşdırılmamış taksi fəaliyyəti həm işgüzar nüfuza mənfi təsir edir, həm də sərnişinlərin təhlükəsizliyi üçün ciddi risklər yaradır. Bu kimi xoşagəlməz halların qarşısını almaq məqsədilə, hava limanında fəaliyyət göstərən taksi operatorlarının vahid, keyfiyyətli və tənzimlənmiş xidmət standartlarına uyğun xidmət təqdim etməsi zəruri hesab edilir. Qeyd olunub ki, bu tələblər şəxsi nəqliyyat vasitələri ilə hava limanına edilən səfərlərə şamil edilmir.
Sosial Şəbəkələrdə Səslənən Tənqidlər: İnhisarçılıq İddiaları
Qərar sosial şəbəkələrdə taksi sürücüləri və influenserlər tərəfindən ciddi tənqidlərə məruz qalıb. “AvtoStop” radio verilişinin aparıcısı Tural Yusifov “Facebook” səhifəsində bunun əsaslandırılmadığını bildirib. O qeyd edib ki, sərnişinin hansı taksi xidmətindən istifadə edəcəyini özü seçmə hüququ var və lisenziyalı, vergi ödəyən taksi sürücülərinin fəaliyyətinin məhdudlaşdırılması səbəbsizdir. Yusifov bu qərarı London taksilərindən istifadəni süni şəkildə artırmaq məqsədi güdən inzibati addım kimi şərh edib.
İqtisadçı və Respublikaçı Alternativ (ReAL) partiyasının sədri Natiq Cəfərli də qərarın inhisarçılıq məqsədilə verildiyini iddia edib. O, “Facebook” səhifəsində “Məmurlarımız bu yolla, yəqin ki, turizmi inkişaf etdirirlər, “halal olsun”” ifadəsini işlədib. Natiq Cəfərli əlavə edib ki, bu addım hər hansı məmur övladının “hava limanından şəhərə gəlişi inhisara alım, ancaq mənə hər gedişdən pay verən sürücülər işləsinlər, oturduğum yerdə gündə 5-10 min manat qazanım” kimi primitiv məntiqindən doğa bilər.
“London Taksi Xidməti”nin Dövlət Statusu
Qeyd edək ki, London taksilərinin fəaliyyətindən məsul olan ”Bakı Taksi Xidməti” MMC Rəqəmsal İnkişaf və Nəqliyyat Nazirliyinin tabeliyində fəaliyyət göstərən və Azərbaycandakı yeganə dövlət təyinatlı taksi xidmətidir.
Leave a Reply