32 yaşlı Selena Gomez və 36 yaşlı musiqi prodüseri Benny Blanco cütlüyü ötən dekabr ayında nişanlandığını elan edib. Müğənni sosial media hesabında evlilik təklifi aldığı anları “Əbədiyyət indi başlayır” qeydi ilə paylaşaraq, bu xoş xəbəri izləyiciləri ilə bölüşmüşdü. Benny Blanco da sevgilisinin paylaşımına “Gözləyin, o mənim həyat yoldaşımdır” sözləri ilə münasibət bildirmişdi. Bu elan cütlüyün pərəstişkarları arasında böyük sevinclə qarşılanıb.
Cütlüyün yaxın ay ərzində nikah masasına oturacağı gözlənilir. Bu münasibətlə Selena Gomez toy öncəsi adətlərə uyğun olaraq möhtəşəm bir bekarlığa veda partisi təşkil edib. Müğənni rəfiqələri ilə birlikdə Meksikanın məşhur kurort şəhəri Kabo San Lukasda unudulmaz anlar yaşayıb. O, bu əyləncəli anlardan fotoları öz sosial şəbəkə hesablarında izləyicilərinə təqdim edib.
Ötən həftəsonu keçirilən tədbirdə Selena Gomez və rəfiqələri əvvəlcə dəbdəbəli bir villada qalıblar, daha sonra isə dəniz gəzintisinə çıxaraq əyləncələrini davam etdiriblər. Müğənninin şən və pozitiv enerjisi ilə dolu anları sosial mediada böyük maraqla qarşılanaraq, minlərlə bəyənmə və şərh toplayıb.
“ÖZ ÖVLADIMI DÜNYAYA GƏTİRƏ BİLMƏYƏCƏYƏM”
Qeyd edək ki, müğənni ötən aylarda verdiyi səmimi bir müsahibədə sağlamlıq problemləri səbəbindən öz körpəsini daşıya bilməyəcəyini açıqlamışdı. O, təbii yollarla ana ola bilməyəcəyini öyrəndikdə uzun müddət bunun kədərini yaşadığını dilə gətirmişdi. Lakin bu çətinliyə baxmayaraq, o, həyatına sevgi qatan prodüser sevgilisi ilə xoşbəxt bir gələcək qurmağa hazırlaşır.
Leave a Reply