Milyonlarla Maxwell House qəhvəsi Amerika evlərinin əvəzsiz qonağıdır. İndi bu nəhəng marka 133 illik tarixində ilk dəfə olaraq gözlənilməz bir addım atıb. Dəyişən iqtisadi şərtlərə diqqət çəkmək məqsədilə adını müvəqqəti olaraq dəyişən qəhvə markası, yeni pazarlama kampaniyası ilə rəflərdə “Maxwell Apartment” adı altında təqdim olunacaq.
133 İL SONRA ADINI DƏYİŞDİ
Kraft Heinz-in tərkibindəki qəhvə markası, Amerika əhalisinin üçdə birinin ev almaq əvəzinə kirayədə yaşamağa üstünlük verməsinə işarə edərək bir müddət bu adla satışa çıxarılacaq. Markanın internet səhifəsində yayımlanan mətbuat bülletenində qeyd edilir: “Dəyərin hər zamankından daha vacib olduğu bir dövrdə, Amerikalılar gündəlik həyatlarının hər sahəsində — yaşayış yerləri də daxil olmaqla — dəyər axtarışındadırlar.”
Şirkət ad dəyişikliyinin yalnız pazarlama kampaniyasına aid olduğunu və məhsulların “eyni keyfiyyətli tərkib, ətir və dadını” qoruyacağını açıqladı. Yeni qablaşdırmadakı qəhvənin “sevilən Maxwell House Original Roast Ground Coffee ilə eyni” olduğu, yeganə fərqin isə kirayəçilərə özəl bir mövzu daşıdığı vurğulandı.
YENİ ADI “MİLLİ QƏHVƏ GÜNÜ”NDƏ TANITILDI
Maxwell Apartment markalı məhdud sayda xüsusi qutular 29 sentyabr – Milli Qəhvə Günündə bazara çıxarıldı. Kampaniya çərçivəsində müştərilərə qəhvələrini 12 aylıq “kirayə” sistemi ilə almaq imkanı təklif olunur. Beləliklə, istehlakçılar həm bir illik qəhvə ehtiyatlarını təmin edə, həm də qənaət edə bilərlər.
Kampaniya, qəhvə qiymətlərinin rekord səviyyələrə yaxınlaşdığı bir dövrdə başladıldı. ABŞ Əmək Statistikası Bürosunun yayımladığı son İstehlakçı Qiymət İndeksi məlumatlarına görə, avqust ayında qəhvə qiymətləri illik müqayisədə 20,9%, aylıq müqayisədə isə 3,9% artıb. Bu göstərici, 2011-ci ilin iyulundan bəri qeydə alınan ən yüksək illik artım kimi tarixə düşüb. Artımın səbəbləri arasında qlobal istehsalda yaşanan çətinliklər və gömrük rüsumlarının təsiri göstərilir.
