Suriya paytaxtının kənarında yerləşən Dveyla şəhərciyindəki partlayış Mər Elias Kilsəsində insanlar ibadət edərkən baş verib.
Suriyada bir intiharçı, insanlarla dolu bir kilsəyə hücum edərək ən azı 15 nəfəri öldürüb, onlarla insanı isə yaralayıb. Bu barədə Suriya Mülki Müdafiə Təşkilatı və təhlükəsizlik rəsmiləri məlumat yayıb.
Dəməşqin kənarında, Dveylada baş verən partlayış bazar günü Mər Elias Kilsəsində insanlar ayin zamanı ibadət edərkən qeydə alınıb.
Hadisəyə görə dərhal heç bir qrup məsuliyyəti öz üzərinə götürməsə də, Suriya Daxili İşlər Nazirliyi İSİL (İŞİD) qrupuna mənsub bir döyüşçünün kilsəyə daxil olaraq insanlara atəş açdığını, daha sonra isə üzərindəki partlayıcı qurğunu işə saldığını bildirib. Bu məlumat bəzi şahid ifadələri ilə də üst-üstə düşürdü.
Bildirilən ölənlərin sayı ilkin idi. Suriya Mülki Müdafiə Təşkilatının bazar günü Telegram-da verdiyi açıqlamada deyilir: “Xilasetmə qrupları hadisə yerindən cəsədləri çıxarmağa davam edir.”
Ayrı-ayrılıqda, iki təhlükəsizlik rəsmisi Reuters xəbər agentliyinə hazırda ölənlərin sayının 15 olduğunu təsdiqləyib.
Rəsmi dövlət agentliyi SANA, Səhiyyə Nazirliyinə istinadən bildirib ki, daha ən azı 50 nəfər yaralanıb.
Britaniya mərkəzli müharibə monitorinq təşkilatı Suriya İnsan Hüquqları Müşahidə Təşkilatı isə ən azı 30 nəfərin yaralandığını və ya öldüyünü bildirib, lakin dəqiq say verməyib.
Bəzi yerli media qurbanlar arasında uşaqların da olduğunu xəbər verib.
Bu, Suriyada illər sonra baş verən ilk belə hücum idi və Prezident Ahmed əl-Şaraanın rəhbərlik etdiyi yeni müvəqqəti hökumətin azlıqların dəstəyini qazanmağa çalışdığı bir vaxta təsadüf edir.
Əl-Şaraa Suriya üzrə səlahiyyətini genişləndirməyə çalışarkən, yüz minlərlə insanın həyatına son qoyan və milyonlarla insanı didərgin salan, az qala 14 illik dağıdıcı vətəndaş müharibəsindən sonra ölkədə İSİL kimi qruplaşmaların yatan hüceyrələrinin mövcudluğu ilə bağlı narahatlıqlar var.
Ahmed əl-Şaraa 2025-ci ilin yanvarında prezident olduqdan sonra Suriya beynəlxalq aləmə əhəmiyyətli dərəcədə qayıdış edib. Həm ABŞ, həm də Avropa İttifaqı devrilmiş Prezident Bəşər Əsəd dövründən qalan sanksiyaları ləğv edib.
“Kilsəyə atəş açırdı”
Özünü Ravad kimi təqdim edən bir şahid Associated Press-ə bildirib ki, kilsənin yaxınlığından keçərkən hücumçunu, həmçinin onunla birlikdə qaçan iki nəfəri görüb.
“O, kilsəyə atəş açırdı… daha sonra kilsənin içinə girib özünü partlatdı,” o deyib.
Təhlükəsizlik qüvvələri və ilk yardım əməkdaşları dərhal hadisə yerinə gəliblər.
Panikaya düşmüş sağ qalanlar ağlaşaraq fəryad edir, bir qadın diz çöküb hönkür-hönkür ağlayırdı.
Suriya İnformasiya Naziri Həmzə əl-Mustafa partlayışı qınayaraq, onu “terror” hərəkəti adlandırıb.
“Bu qorxaq əməl bizi bir araya gətirən vətəndaş dəyərlərinə ziddir,” o, X sosial şəbəkəsindəki paylaşımında yazıb.
“Bərabər vətəndaşlıq öhdəliyimizdən geri çəkilməyəcəyik… və dövlətin cinayətkar təşkilatlarla mübarizə aparmaq və cəmiyyəti onun təhlükəsizliyini təhdid edən bütün hücumlardan qorumaq üçün bütün səylərini göstərəcəyinə dair vədinə də əməl edəcəyimizi təsdiqləyirik.”
Fransa Xarici İşlər Nazirliyi bu “iyrənc” hücumu qınayıb. Nazirlik bəyanatında bildirib ki, Fransa “Suriya xalqı ilə tam həmrəyliyini ifadə edir və Suriyanın sülhə qayıtmasını arzulayır”.
Suriya Mülki Müdafiə Təşkilatı tərəfindən yayılan fotoşəkillər kilsənin daxili hissəsinin dağıntılar altında qaldığını, oturacaqların dağıntı və qanla örtüldüyünü göstərirdi.
