Katzdan Orduya Davam Talimatı: Atəşkəsə Baxmayaraq Dağıntılar Sürür
ABŞ prezidenti Donald Trampın rəhbərliyi altında və aralarında Türkiyənin də olduğu zəmanət verən tərəflərin təsdiqi ilə qüvvəyə minən atəşkəsə baxmayaraq, İsrail ordusu bəzi yerlərdə hücumlarını davam etdirir. Bu şəraitdə İsrailin Müdafiə naziri Yisrael Katzdan maraqlı bir bəyanat gəldi.
Katz, “X” sosial media hesabında etdiyi paylaşımda, orduya Qəzza zolağının atəşkəs və əsir mübadiləsi sazişi çərçivəsində İsrailin nəzarətində qalan hissəsində dağıntıları davam etdirmək tapşırığı verdiyini açıqladı. Katz, bəyanatında, tünellərin dağıdılması, HƏMAS-ın silahsızlaşdırılması və Qəzzanın demilitarizasiyasının onlar üçün strateji hədəf olduğunu bildirdi. Nazir İsrailli əsirlərin cəsədlərinin qaytarılmasının ən vacib vəzifələri olduğunu da xatırlatdı və bunun üçün əllərindən gələni edəcəklərini vurğuladı.
ABŞ ilə Razılaşdırılmış Qərarlar
Qəzza zolağındakı tünellərin 60 faizinin hələ də salamat olduğunu iddia edən Katz, İsrail ordusuna sarı xəttin onların nəzarətində qalan tərəfində dağıntı işlərinə davam etmək tapşırığı verdiyini qeyd etdi. Katz, bu qərarın ABŞ rəsmiləri ilə aparılan danışıqlar çərçivəsində əlaqələndirilərək qəbul edildiyini irəli sürdü. ABŞ prezidenti Donald Tramp oktyabrın 9-da Misirdə davam edən danışıqlarda İsrail ilə HƏMAS-ın Qəzzada atəşkəs planının ilk mərhələsini təsdiqlədiyini elan etmişdi. Saziş danışıqların aparıldığı Misirdə Türkiyənin də iştirakı ilə imzalanaraq, İsrail hökumətinin təsdiqi ilə oktyabrın 10-da qüvvəyə minmişdi.
Beynəlxalq Qüvvələr Məsələsi və Netanyahunun Mövqeyi
Bu arada ABŞ prezidenti Donald Tramp, atəşkəsin yaradıldığı Qəzzada təhlükəsizliyi təmin etmək üçün qurulacaq Beynəlxalq Sabitlik Qüvvəsinin “çox sürətlə” bölgəyə yerləşdiriləcəyini bildirdi.
Lakin İsrailin Baş naziri Binyamin Netanyahu isə Qəzzada yerləşdiriləcək beynəlxalq qüvvələrin hansı ölkələrdən ibarət olacağına özlərinin qərar verəcəyini, Vaşinqtonun da bunu qəbul edəcəyini iddia etdi. Türkiyənin iştirak etməməsi istiqamətində davamlı olaraq lobbiçilik edən İsrail Baş naziri, həftəlik kabinet iclası ərəfəsində verdiyi bəyanatda dedi: “Biz açıq şəkildə bildirdik ki, İsrail (Qəzzaya yerləşdiriləcək) beynəlxalq qüvvələr məsələsində hansı ölkələrin bizim üçün qəbuledilməz olduğuna qərar verəcək və biz bu şəkildə hərəkət edəcəyik, elə də davam edəcəyik.” ABŞ-ın Qəzzadakı atəşkəsi “tətbiq etdiyi” xəbərləri və işğal altındakı İordan çayının qərb sahilini ilhaq layihəsinə birbaşa qarşı çıxması ilə bağlı Vaşinqtonun İsraili idarə etməsinə dair ortaya çıxan fikirləri “mənasız” hesab etdiyini bildirən Netanyahu, “İsrail müstəqil dövlətdir. Biz özümüzü müdafiə edəcəyik və öz taleyimizi özümüz təyin etməyə davam edəcəyik” sözlərini işlətdi.
İsrail UNIFIL Patrulunu Hədəf Aldı
İsrailə məxsus pilotsuz uçuş aparatının (PUA) Livanın cənubundakı Nebatiyənin Kefr Kila qəsəbəsi yaxınlığında, BMT Livan Müvəqqəti Qüvvələrinin (UNIFIL) patruluna yaxınlaşaraq bomba atdığı və qısa müddət sonra bir tankın da sülhməramlılara atəş açdığı bildirilir. Hücum nəticəsində insan tələfatı və ya maddi ziyanın olmadığı öyrənilsə də, eyni ərazidə daha əvvəl də bənzər hadisənin baş verdiyi qeyd edildi.
Misir Ekibinə İcazə
İsrailin, Misir axtarış-xilasetmə qruplarının, HƏMAS-ın atəşkəs və əsir mübadiləsi çərçivəsində qaytarmalı olduğu İsrailli əsirlərin cəsədlərini tapmaq üçün aparılan işlərə qatılmaq məqsədilə Qəzzaya daxil olmasına icazə verdiyi bildirilir. İsrail mətbuatı bu icazənin ABŞ-ın təzyiqləri nəticəsində verildiyini iddia edərkən, Misir qrupunun Beynəlxalq Qırmızı Xaç Komitəsi (BQXK) ilə koordinasiyalı fəaliyyət göstərəcəyi qeyd edildi.
Qəzza Məhkəməsində Yekun Qərar
İsrailin Qəzzada davam etdirdiyi müharibə cinayətlərini araşdırmaq üçün qlobal və müstəqil bir təşəbbüs olaraq, London və Sarayevodakı iclaslarından sonra yekun iclasını İstanbulda keçirən Qəzza Məhkəməsi yekun qərarını açıqladı.
BMT-nin Fələstin üzrə keçmiş məruzəçisi professor doktor Riçard Falkın sədrliyi ilə bir araya gələn məhkəmə üzvləri, üç gün ərzində təhsildən səhiyyəyə, yaşayış hüququndan mətbuata qədər soyqırımın bir çox fərqli cəhətdən şahidliklərini dinlədilər. 150-dən çox şahid dinlənildi, alimlər və fəallar da soyqırım prosesindəki müşahidələrini danışdılar. Açıqlanan qərarda deyildi: “Biz cinayətkarların və onların şəriklərinin hesabat verməsini, zərərçəkənlərə və sağ qalanlara təzminat ödənilməsini, sionist müstəmləkəçiliyin və işğalın aradan qaldırılmasını, cinayətkar rejimin normallaşdırılmasına yönəlmiş bütün cəhdlərin rədd edilməsini və nəticədə Fələstinin azadlığını tələb edirik. Bir sözlə, ədalət istəyirik”. Həmin qərarda, İsrail rejimini təcrid etmək, normallaşmanı rədd etmək, İsraili hesabat verməyə məcbur etmək üçün boykotlar, investisiyaların geri çəkilməsi, sanksiyalar, hərbi embarqolar, cinayət təqibləri, mülki iddialar, ictimai maarifləndirmə, ictimai etirazlar və vətəndaş itaətsizliyi aksiyaları təşkil etməyə çağırış edildi.
