Real Madridin darmadağınla başa çatan derbi matçının əks-sədası
Arda Gülerin formasını geyindiyi Real Madrid komandasının La Liqada Atletico Madridə 5-2 hesabı ilə uduzması futbol ictimaiyyətində böyük rezonans doğurub.
Matça start heyətində başlayan Arda Güler 1-0 geridə olan komandasını bir qol və bir məhsuldar ötürmə ilə 2-1 hesablı üstünlüyə çıxarmışdı.
Xabi Alonsonun Arda Güler qərarı tənqid hədəfində
Real Madridin 3-2 hesabı ilə geriyə düşməsindən sonra, 59-cu dəqiqədə Arda Gülerin oyundan çıxarılması baş məşqçi Xabi Alonsonun tənqid edilməsinə səbəb oldu. Qarşılaşmanın bitməsindən sonra özünü tənqid edən ispan məşqçinin türk futbolçu ilə danışdığı bildirilir.
“Səni oyundan çıxarmamalı idim”
İspaniyanın Defensa Central nəşrində yayımlanan “Xabi Alonso matçdan sonra Arda Gülerdən üzr istədi” başlıqlı xəbərə əsasən, uğurlu baş məşqçi ulduz oyunçu ilə apardığı söhbətdə “Bəlkə səhv etdim, səni oyundan çıxarmamalı idim” deyib.
Xəbərin davamında Alonsonun türk futbolçunu əksər matçlarda ilk on birliyə daxil etməyi planlaşdırdığı vurğulanıb.
Arda Gülerin bu mövsüm La Liqada 3 qol və 3 məhsuldar ötürmə ilə oynadığı, Atletico Madridlə matçda isə Mbappeə qol ötürməsi verdiyi və bir qol vurduğu xatırladılıb. “Real Madridin ən yaxşı oyunçusu idi, orta sahədə oyunu qurmağa çalışan yeganə oyunçu idi. Lakin baş məşqçinin verməli olduğu vacib qərarlar var idi və onu oyundan çıxarmağa üstünlük verdi” – deyə qeyd olunub.
