Avropa Ədalət Məhkəməsindən Ev heyvanı Statusuna Dair Yeni Qərar
Lüksemburqda yerləşən, Avropa İttifaqının ən yüksək hüquq orqanı sayılan Avropa Ədalət Məhkəməsi, Buenos Ayresdən Barselonaya həyata keçirilən uçuşda itən köpək barədə açılan iddiada mühüm qərar elan edib. Məhkəmə, ev heyvanlarının uçuşlarda “bağaj” kimi qəbul edilə biləcəyinə dair prinsipial mövqe ortaya qoyub.
Qərarda qeyd olunur ki, “hava səyahəti məqsədləri üçün ev heyvanı ‘bağaj’ anlayışına daxil edilir və ev heyvanının itkisindən yaranan zərərin təzminatı bağaj məsuliyyəti qaydalarına tabedir.” Bu qərar, aviasiya sektorunda ev heyvanlarının daşınması ilə bağlı hüquqi çərçivəyə aydınlıq gətirərək, hava yolu şirkətlərinin bu cür hallardakı məsuliyyətini müəyyənləşdirir.
Sözügedən hadisə 2019-cu ildə Iberia Hava Yolları ilə Buenos Ayresdən Barselonaya reys zamanı baş vermişdi. Bir sərnişin öz köpəyini qəfəs içində hava yoluna təhvil vermişdi. Təəssüf ki, heyvan təyyarəyə aparılarkən qaçmış və sonradan tapılmamışdı.
Bu vəziyyətlə qarşılaşan yolçu, İspaniyada hava yolu şirkətinə qarşı iddia qaldıraraq 5 min avro mənəvi təzminat tələb etmişdi. İspaniya məhkəməsi isə işin hüquqi çərçivəsini dəqiqləşdirmək üçün Avropa Ədalət Məhkəməsinə müraciət etmişdi.