“Qalatasaray” Banklar Birliyindən çıxdı: Dursun Özbek açıqlamalar verdi
“Qalatasaray” klubu iyul ayının Divan Şurasının toplantısını keçirib. Klub prezidenti Dursun Özbek Divan Şurası üzvlərinə müraciət edib. Dursun Özbek Banklar Birliyindən çıxılması ilə bağlı açıqlamasında “Yoldaşlarımızla birlikdə sizə verdiyimiz daha bir sözü yerinə yetirməyin sevincini yaşayırıq. İyulun 22-si etibarilə Banklar Birliyi anlaşmasını bitirdik” deyib.
40 milyon dollar faiz ödənişi
“Rəhbərlik olaraq üç ildə ümumilikdə 4 milyard 710 milyon 952 min TL əsas məbləğ və faiz ödəmişik. Bu borcdan necə qurtulduğumuzu anlamaq üçün rəqəmlərin bilinməsi vacibdir. İldə 40 milyon dollara çatan faiz ödənişlərimiz var idi. İndi bundan qurtulmağın sevincini yaşayırıq.”
Futbol ailəsinə liderlik etdiyimiz üçün xoşbəxtəm
“Qalatasaray”, Banklar Birliyindən çıxmaq fikrini ilk dəfə ortaya atan idman klubu olub. Bunu dəfələrlə sizə demişəm. Rəqiblər bu mövqeni tənqid etdilər, layihələrimizi tənqid etdilər, amma sonda hamısı bizim dediyimizə gəldi. Bu baxımdan futbol ailəsinə liderlik etdiyimiz üçün son dərəcə xoşbəxtəm.”
Mustafa Cəngizə təşəkkür
“Qalatasarayı rəqabət apardığı hər sahədə davamlılığını təmin etmək üçün çalışmağa davam edəcəyik. Banklar Birliyi bu hədəfimiz üçün ayağımıza vurulan bir zəncir kimi idi. Mərhum prezidentimiz Mustafa Cəngizə də səmimi təşəkkür edirəm.”
Florya layihəsi
“Floryadakı ərazinin inkişaf etdirilməsi yolu ilə avans almağı düşündüyümüzü söylədik. Əsas məqsədimiz Banklar Birliyinə olan qalıq borcumuzu ödəmək idi. Əgər əlavə vəsait qalarsa, keçmiş dövrlərdən qalan borclarımızı ödəyəcəyimizi bildirmişdik. Nə demişiksə, eynisini edirik. Sizə nə söz vermişiksə, arxasında durduq və yerinə yetirmək üçün ən yüksək səyi göstərdik. Ən böyük təşəkkürü siz ümumi şura üzvlərinə göndərirəm. Çünki siz, mənə və yoldaşlarıma inandınız, bizləri dəstəklədiniz. Bu dəstək çox dəyərli idi. Sizə verdiyimiz sözü yerinə yetirmək, məni necə bir əhval-ruhiyyəyə saldı, bilməzsiniz… Florya hərracımızı uğurla tamamladıq. Hərrac komissiyasının sədri Adnan Polata və üzvlərinə təşəkkür edirəm. Hərrac şərtnaməsi “Qalatasaray”ın hüquqlarını qoruyan və “Qalatasaray”ın gələcəyi üçün narahatlıq yaratmayan şəkildə hazırlanıb. Təxminən 50 milyon dollarlıq avans ödənişini TL olaraq aldıq.”
