Almaniya Federal Məclisinin üzvü Jürgen Hardt, Berlinin Yaxın Şərq siyasətindən tutmuş Türkiyənin Eurofighter tələbinə, iqtisadi siyasətdən Almaniyadakı müsəlmanlara qarşı baş verən hadisələrə qədər gündəmin əsas mövzularına Milliyet.com.tr-yə müsahibəsində aydınlıq gətirib.
İsrail mövqeyi: “Qərarlar şübhə doğurur”
Son dövrlərdə xarici mediada geniş əks-səda doğuran Almaniyanın İsrail ilə silah ticarətini qismən məhdudlaşdırma qərarını dəyərləndirən Hardt deyib: “Almaniya, İsrailin varlıq haqqını və təhlükəsizliyini dövlət siyasəti kimi qəbul edir. Lakin İsrail hökumətinin Qəzzadakı mövqeyində fərqliliklər var. Buradakı məsələ Həmasın rolu deyil, çünki biz Qəzzada Həmas rəhbərliyinin tamamilə sona çatmasını açıq şəkildə tələb edirik. Bizim üçün yalnız Prezident Abbasın rəhbərliyi altındakı Fələstin Administrasiyası (PA) gələcəkdəki bir Fələstin hökumətinin özəyini təşkil edir. Lakin İsrail təhlükəsizlik kabinetinin son qərarlarının Həması strateji olaraq məğlub etmək və Qəzzadakı mülki əhalinin zərər görməsinin qarşısını almaq üçün uyğun olduğunu şübhəli görürük; buna görə də İsrail hökumətinə zəruri bir siqnal verilir. İndi vəziyyətin necə inkişaf edəcəyini gözləyəcəyik və bu mövzuda Türkiyə hökuməti ilə də sıx təmasdayıq.”
Fələstin Dövləti: “Gələcək hədəfimizdir”
Avropadan ard-arda gələn Fələstin dövlətinin tanınması ilə bağlı açıqlamalara Berlindən verilən mövqeyə toxunan Hardt bildirib: “Hökumət koalisiyası daxilində və ondan kənarda, iki dövlətli həllin davamlı sülh üçün yeganə real seçimimiz olduğu barədə böyük bir fikir birliyi var. Buna görə də, bir Fələstin dövlətinin qurulması açıq şəkildə bizim hədəfimizdir. Lakin hazırda bu, hələ tezdir və ciddi danışıqlar aparılmadan həyata keçirilməməlidir. Yenə də gələcəkdəki bir dövlətin qurulmasını çətinləşdirən qeyri-qanuni yaşayış məskənləri fəaliyyətləri kimi bütün addımları tənqid edirik. İllərdir Fələstin Administrasiyası ilə sıx əməkdaşlıq edərək mövcud vəzifələrini yerinə yetirməsini asanlaşdırmağa çalışırıq.”
Türkiyə-Almaniya əlaqələri: “İki ölkə bir-birinə bağlıdır”
Türkiyə-Almaniya əlaqələrinə dair fikirlərini də bölüşən Hardt deyib:
İki ölkə hər zaman bir-biri üçün böyük rol oynayacaq, bunu həm ölkə böyüklüyümüz, həm də Almaniyadakı çoxsaylı türk və türkəsilli vətəndaşlarla, həmçinin Türkiyədəki almanlar təmin edir. Ölkələrimiz bir-birinə bağlıdır və ağıllı heç kim bunu inkar edə bilməz. Almaniyadakı türkəsilli almanlar illərdir cəmiyyətimizi zənginləşdirir. Türkiyə narahat bir mühitdə yaşayır və mən bu mühitdə həm Qərbdən böyük dəstək ehtiyacı görürəm, həm də Suriya kimi sahələrdə ortaq əməkdaşlıq imkanları olduğunu düşünürəm.
Almaniyanın iqtisadi siyasətləri: “İslahat payızı yaşayacağıq”
Almaniya Federal Məclisinin üzvü Hardt, Fridrix Mertzin iqtisadi və sosial siyasətlərini də qiymətləndirib: “Bir islahat payızı yaşayacağıq. Almaniya, bizi böyük və güclü edən iqtisadi dinamizmin bir hissəsini itirdi. Sosial sistemlərimiz yaxşıdır, lakin yetərincə maliyyələşdirilməyib, qismən ədalətli deyil və təəssüf ki, sui-istifadə edilir. Bunu dəyişdirmək və insanların əməyinin müqabilində daha çox qazanc əldə etməsini təmin etmək istəyirik; həmçinin sosial sistemləri də sabit saxlamaq istəyirik. Yeri gəlmişkən, bu mövzu xüsusilə mənim seçki dairəmdəki türkəsilli insanlarla tez-tez qarşılaşdığım bir məsələdir: İşləməyin qarşılığını almaq lazımdır. Miqrantlar, əcdadlarının necə çalışdığını və əməyin dəyərini hələ də bilirlər.”
Müsəlmanlara qarşı ayrı-seçkilik: “Cəmiyyəti zəiflədir”
Almaniyadakı müsəlmanlara qarşı hadisələrə də toxunan Hardt deyib: “Hər hansı bir qrupa qarşı bütün ayrı-seçkilik hücumları cəmiyyətimizi zəiflədir. Almaniya kimi
əsas şərt, hər kəsin özünü sərbəst şəkildə inkişaf etdirə biləcəyi ən geniş sahəni tapması və digər hər kəslə bərabər hüquqlara sahib olmasıdır; heç kim təhlükə altında olmamalıdır. Daxili İşlər Naziri Aleksandr Dobrindt, hər kəs üçün daha çox təhlükəsizlik təmin etmək üçün əlindən gələni edəcəyini açıq şəkildə bildirib.”
“Eurofighter” razılaşması: “Türkiyə bölgənin hərbi öncü qüvvəsidir”
Keçən ay Berlin hökuməti Türkiyəyə 40 ədəd Eurofighter döyüş təyyarəsinin satılmasını təsdiqləmişdi. Hardt, Türkiyənin tələbini təsdiqləməyi “doğru bir qərar” adlandıraraq deyib: “Türkiyə ilə NATO-nun qalan hissəsi arasındakı daha çox təhlükəsizlik siyasəti əməkdaşlığı, bir ‘qazan-qazan’dır. Bəzi qərarların, xüsusilə S-400 alımı ilə bağlı qərarların uzun müddətli narahatlıqlara yol açdığını gizlətmək istəmirəm. Buna görə də, gələcəkdə birlikdə ardıcıl və etibara əsaslanan hərəkət etmək çox vacibdir. Türkiyənin bölgədə müsbət və aktiv hərbi rol oynamasını istəyirik; Türkiyə, NATO-nun getdikcə daha strateji əhəmiyyət kəsb edən bir bölgədə öncü hərbi qüvvəsi mövqeyindədir.”
