Kütləvi Tədbirdə İzdiham: Ölən və Yaralananlar Var
Yerli mənbələrdən verilən məlumata görə, yalnız 10 min nəfərin girişinə icazə verilən əraziyə, məşhur aktyor Vijayı görmək üçün təxminən 120 min insan axın edib. Kütlənin nəzarət altına alınmaması nəticəsində mitinq keçirilən ərazidə böyük bir izdiham yaşanıb. Tamil Nadu Səhiyyə Nazirliyi ölü sayının arta biləcəyindən narahatlığını ifadə edərək, bəzi yaralıların vəziyyətinin kritik olduğunu bildirib. Zərərçəkənlər ətrafdakı xəstəxanalarda müalicə altına alınıb.
Gecikmə Gərginliyi Artırdı
Hadisə şahidləri qeyd ediblər ki, Vijayın günorta saatlarında əraziyə gəlməsi gözlənilsə də, ən azı altı saatlıq bir gecikmə yaşanıb. Kütlə getdikcə sıxlaşarkən, Vijay danışmağa başlayanda vəziyyət daha da gərginləşib. Artan istilik və sıxlıq səbəbindən uşaqlar da daxil olmaqla bir çox insanın halı pisləşib. Vəziyyətin ciddiliyini anlayan Vijay çıxışını yarımçıq kəsib, kütləni sakitləşməyə çağırdıqdan sonra ərazini tərk edib.
Baş Nazir Modidən Başsağlığı
Hindistanın Baş naziri Narendra Modi sosial media hesabında etdiyi açıqlamada, “Tamil Nadunun Karur şəhərindəki siyasi mitinqdə baş verən təəssüfverici hadisə məni dərindən kədərləndirdi. Sevdiklərini itirən ailələrin dərdini bölüşürəm. Yaralılara tezliklə sağalmasını arzulayıram” ifadələrini işlədib.
Genişmiqyaslı İstintaq Başladıldı
Faciədən sonra təhlükəsizlik qüvvələri genişmiqyaslı istintaqa başlayıb. Səlahiyyətli şəxslər mitinq ərazisində görülən təhlükəsizlik tədbirlərini və izdihama səbəb olan laqeydlikləri diqqət mərkəzinə alıblar. Region əhalisi isə baş verən hadisədən sonra həm təşkilati çatışmazlıqlara, həm də kütlənin nəzarətsiz şəkildə əraziyə yönləndirilməsinə etirazlarını bildiriblər.
