Fənərbaxçanın yeni transferi Edson Alvarez, komandasına qatılmaqdan duyduğu məmnuniyyəti ifadə edərək, azarkeşlərə sahədə əlindən gələnin ən yaxşısını edəcəyinə söz verib.
İngiltərənin Vest Hem Yunayted klubundan icarəyə götürülən meksikalı yarımmüdafiəçi, Fənərbaxça TV-yə açıqlamalar verib.
Transfer prosesi və ilk təəssüratlar
Alvarez, indiyə qədər hər şeyin müsbət getdiyini qeyd edərək, “Böyük bir kluba gəldiyiniz zaman, möhtəşəm bir azarkeş ordusu gözləyirsiniz. Mən də bunu gözləyərək bura gəldim və gözlədiyimdən də artıq bir şey gördüm. Heyranedici azarkeşlərimiz var. İlk gündən etibarən mənə çox böyük sevgi göstərdilər, bu da bir futbolçu kimi mənim üçün çox önəmlidir, çünki bu sevgini hiss etdiyim zaman sahədə əlimdən gələnin ən yaxşısını etmək mənim üçün daha asan olur. Şəhər haqqında da danışa bilərəm. İstanbul həqiqətən inanılmazdır. Çox gözəldir. Havası da əladır. Komanda yoldaşlarımla tanış oldum, hamısı çox yaxşı insanlardır. Beləliklə, hər şey çox müsbətdir” deyib.
Fənərbaxçanın böyüklüyü
“Hər kəs Fənərbaxçanın böyüklüyünü bilir” deyən Edson Alvarez, “Bura gəlməmişdən əvvəl bu klubun nə qədər böyük olduğunu bilirdim. Bu, təkcə Meksikada deyil, hər yerdə məlumdur. Zaten hər kəs Fənərbaxçanın böyüklüyünü bilir. Gəlməmişdən əvvəl bəzi keçmiş komanda yoldaşlarımla danışdım. Dusan Tadiçlə Ayaksda birlikdə oynamışdıq. Tadiçdən məlumat aldım, xüsusilə İstanbulu soruşdum, çünki ailəm üçün də yaşayacağımız şəhər çox önəmlidir. O, yalnız gözəl şeylər söylədi, bu da bura gəlmək üçün məni daha da həvəsləndirdi” sözlərini əlavə edib.
Azarkeşlərin atmosferi
Kocaelispor matçını tribunadan izləyən 27 yaşlı futbolçu, atmosferlə bağlı təəssüratlarını bölüşüb: “Bura gəlməmişdən əvvəl hər kəs mənə azarkeşlərimizin inanılmaz olduğunu söyləmişdi. 90 dəqiqə boyunca komandanı dəstəklədiklərini söylədilər. Mən də buna tribunadan izlədiyim ilk matçda şahid oldum. Hər an matçın içindədirlər, davamlı olaraq komandanı dəstəkləyirlər. Mən də bir Latın futbolçusu olaraq bundan çox zövq alıram. Bu səbəb məni bu klub və azarkeşlər üçün daha çox mübarizə aparmağa sövq edir”.
Alvarez, stadiondakı atmosferin ailəsi üzərində də ciddi təsir buraxdığını qeyd edərək, “Həyat yoldaşım da gördüyü atmosferdən çox təsirləndi. Əslində bu cür atmosferlər Meksikada, Latın Amerikasında geniş yayılmış bir şeydir. Belə bir atmosfer görmək məni də evimdə hiss etdirdi və bir an əvvəl sahəyə çıxmaq istəyi oyatdı” deyib.
Hədəflər və mesaj
Edson Alvarez, Fənərbaxçada kuboklar qazanmağı hədəflədiklərini bildirib: “Benfika matçında oynaya bilməyəcəyəm, amma bütün qəlbimlə komanda yoldaşlarımı dəstəkləyəcəyəm. Komandamızı izlədim, çox böyük və yaxşı oyunçularımız var. Bir an əvvəl oynamaq üçün çox həyəcanlıyam. Kuboklar qazanmaq istəyirik, hədəflərimiz bu yöndədir. Ümid edirəm ki, azarkeşlərimizə sevinc verə bilərik”.
Sarı-lacivərdli azarkeşlərə mesaj verən Alvarez, “Azarkeşlərimizə sahə içərisində necə bir oyunçu olduğumu oyunumla göstərmək istəyirəm. Məndən bunu gözləyə bilərlər, sahədə hər zaman fədakar və məsuliyyət alan bir futbolçu olacağam. Məsuliyyətimin böyük olduğunun fərqindəyəm, amma bu komanda üçün hər şeyimi verəcəyəm. Mən və ailəm ilk gündən etibarən azarkeşlərimizin göstərdiyi sevgini hiss etdik. Bu məni daha da motivasiya edir. Azarkeşlərimiz üçün sahədə savaşacağam” deyərək sözlərini tamamlayıb.
24 saat
