Çempionlar Liqası həyəcanı: “Qalatasaray” azarkeşləri “Liverpul”un yuxusunu qaçırdı
2025/26 mövsümündə UEFA Çempionlar Liqası-nın qrup mərhələsinin ikinci turunda “Qalatasaray” İngiltərənin “Liverpul” klubunu qəbul edəcək. Qarşılaşma bu axşam saat 22:00-da İstanbuldakı RAMS Park stadionunda baş tutacaq.
Gərgin oyun öncəsi “Qalatasaray” azarkeşlərindən “Liverpula” psixoloji təzyiq
Bu vacib oyun ərəfəsində “Qalatasaray” azarkeşləri “Liverpul” nümayəndə heyətinə gecə saatlarında gözlənilməz sürpriz yaşadıblar.
Otelin qarşısında yüzlərlə fişəng partladı
Dünən günorta saatlarında İstanbula gələn İngiltərə komandası RAMS Parkda keçirilən mətbuat konfransından sonra qalmaq üçün otelə yollanıb. Sarı-qırmızılı azarkeşlər gecə saatlarında “Liverpul”un qaldığı otelin qarşısına toplaşıblar və gecəni gündüzə çeviriblər.
Gecə saatlarında “Liverpul”un qaldığı otelin önünə gələn bir qrup azarkeş yüzlərlə hava fişəngi partladıb. “Liverpul” futbolçularının rahat yatmasına mane olmaq üçün havaya atılan fişənglər gecəni işıqlandırıb. Azarkeşlər insident yaratmadan ərazini tərk ediblər.