UEFA Konfrans Liqası pley-off mərhələsinin ilk oyununda İstanbul Başakşehirə qonaq olacaq Rumıniya təmsilçisi Universitatea Craiova komandasının baş məşqçisi Mirel Radoi və bir vaxtlar Türkiyədə çıxış etmiş Alexandru Cicaldau mətbuat konfransında fikirlərini bölüşüb.
## Radoi: “Başakşehir bu iki oyunun favoritidir”
Başakşehir Fatih Terim Stadionunda keçirilən mətbuat konfransında çıxış edən Mirel Radoi, rəqib komandanın gücünü yüksək qiymətləndirib. “Bizi çox çətin bir oyun gözləyir. Çox güclü bir rəqiblə qarşılaşacağıq. Başakşehir bu iki oyunun favoritidir. Biz rəqibimizə lazımi qədər hörmət göstərəcəyik, ancaq bu, yalnız oyun öncəsi etdiyimiz bir jestdir”, – deyə o bildirib.
Mirel Radoi, İstanbul təmsilçisinin baş məşqçisi Çağdaş Atanı tərifləyərək, onun son illərdə çalışdırdığı komandalarda oynatdığı futbolla özünü sübut etdiyini qeyd edib. Radoi, “Onların yaxşı və təcrübəli bir baş məşqçisi var. Rəqib topa sahib olarkən çox aqressiv və kompakt oynayan bir komandadırlar. Top onlarda olanda isə çox hücumameyilli və təzyiqli oynayırlar. Əlbəttə ki, əgər çox yaxşı heyətiniz yoxdursa, bu işləri görə bilməzsiniz. Sabah komanda olaraq çox diqqətli və birlikdə oynamalıyıq. Daima sığortalanmalıyıq. Rəqibə çox yer verməməliyik. Onların çox dəyərli futbolçuları var. Bir toxunuşla bizi pis vəziyyətə sala bilərlər. Mənim üçün Berat Özdemir çox təhlükəli və rəqibin balansını pozan bir futbolçudur”, – deyə əlavə edib.
## “Ən kiçik səhv nəticəni dəyişdirə bilər”
44 yaşlı rumıniyalı mütəxəssis, UEFA Konfrans Liqası kimi turnirlərdə səhvlərə yer olmadığını vurğulayaraq, bu matçların mövsümün ən vacib oyunları olduğunu bildirib. “Çünki liqa oyunlarının əvəzi var, amma bu, mübarizə oyunudur. Bu iki oyunda ediləcək ən kiçik səhv nəticəni dəyişdirə bilər. Rəqib haqqında keçmiş futbolçulardan və türkiyəli məşqçilərdən məlumat aldım. Mənə gələn məlumatlara görə, Fənərbaxçadan sonra Başakşehir ən kiçik səhvi belə dəyərləndirən və asan qol vuran komandadır”, – deyə Radoi qeyd edib.
Türkiyədəki azarkeşlərin yaratdığı atmosferlə bağlı suala cavab verən Radoi, “Sahədə mən oynamıram. Zaten bu cür atmosferi sevirəm. Zamanında futbolçu olarkən Qalatasaraya qarşı oynamışam. İstanbulda 2-2 bərabərə qalmışdıq. Bir futbolçu üçün bundan daha gözəl bir şey ola bilməz. Türkiyədəki futbol sevgisi və fanatik azarkeşlər var. Səninlə və ya sənə rəqib olsa da önəmli deyil. Ümid edirəm ki, sabah axşam gözəl bir atmosfer olacaq və futbolçuları daha çox həvəsləndirəcək”, – deyə fikirlərini bölüşüb.
## Cicaldau: “Çətin bir oyuna çıxırıq”
Alexandru Cicaldau isə komandasını çətin bir oyunun gözlədiyini bildirib. İstanbul Başakşehir-in güclü bir komanda olduğunu vurğulayan Cicaldau, “Çətin bir oyuna çıxırıq. Rəqibi tanıyırıq. Çox yaxşı bir komandadırlar, ancaq biz də çox yaxşı hazırlaşmışıq. Bu oyuna ən yaxşı şəkildə çıxıb qazanmağa çalışacağıq. Başakşehir çox keyfiyyətli bir komandadır. Çox yaxşı futbolçuları var. Sabah qələbə üçün sahədə əlimizdən gələnin ən yaxşısını edəcəyik”, – deyə bildirib.
Təcrübəli yarımmüdafiəçi, bir dövr formasını geyindiyi Qalatasarayla bağlı, “Hələ də Qalatasarayı izləyirəm. Çox yaxşı transferlər etdilər. Bu da nəticələrə öz təsirini göstərir. Hər il çempion olmaları yaxşı transferlər etdiklərini göstərir”, – deyə qeyd edib.
İstanbul Başakşehir matçına psixoloji olaraq hazır olduqlarını vurğulayan Cicaldau, iki komanda arasındakı büdcə fərqinin xatırladılmasına cavab olaraq, “Bu mövsümün ən çətin oyunlarından birinə çıxacağıq. Əlimizdən gələnin ən yaxşısını etməyə çalışacağıq. Hazırda yaxşı bir dövrdən keçirik. Əlimizdən gələn hər şeyi etsək, büdcə fərqini aradan qaldırarıq”, – deyə fikrini ifadə edib.
24 saat
