İtalya futbolunda Napolinin maliyyə maxinasiyaları qalmaqalı böyüyür. Klubun keçirdiyi əməliyyatlarda şişirdilmiş dəyərlərin olub-olmaması araşdırılır. Bu istiqamətdə aparılan istintaq zamanı “Qalatasaray”ın ulduz oyunçusu Viktor Osimhenin maliyyə polisinə verdiyi ifadə mətbuata sızdırılıb.
Osimhen şok ifadələr verib
Nijeryalı hücumçunun ifadəsindəki sətirlər olduqca diqqət çəkir. Osimhen, keçmiş menecerinin onun atası ilə maraqlanmadığını və yalnız transfer məsələləri ilə məşğul olduğunu bildirib: “Əvvəlki menecerim, Jean Gerard, yalnız mənim transferim ilə maraqlanırdı, atamın səhhəti ilə yox. O zamanlar ağlımda futbol yox idi. Gerard məni Nitsada görüşə çağırdı. Orada Luis Kampos və “Lill”in prezidenti Gerard Lopes də var idi. Mənə “Napoli”yə keçməli olduğumu, prinsipdə artıq razılığın əldə olunduğunu və pandemiya səbəbindən bunun “Lill” üçün yaxşı fürsət olduğunu dedilər.”
“Heç nə anlamadım”
Osimhen daha sonra bunları əlavə edib: “Amma mən bu barədə heç nə bilmirdim. Atamın ölümündən sonra “Lill”ə və menecerimə inanılmaz dərəcədə əsəbi idim, çünki o ölməmişdən əvvəl onu görə bilməmişdim. Hətta atamın ölümündən xəbərim belə olmadan, ertəsi gün “Napoli”yə getməli olduğumu dedilər. “Lill” prezidentinə hörmətimdən dolayı yenə də Napoliyə getdim, amma heç nə imzalamadım. Layihəni mənə baş məşqçi izah etdi və ertəsi gün Kapridə De Laurentiis ilə görüşdüm. Mənə şəhər və klub haqqında məlumat verdi, amma Giuntoliyə nə dediyini başa düşmədim, çünki italyanca danışırdılar. Müqaviləni görüb-görmədiyimi soruşdu, amma mən heç nə almamışdım.” Bu sözlər transfer prosesində baş verən qaranlıq məqamlara işıq salır.
