Anfielddə Yeni Ulduzun Doğuşu: Rio Ngumoha Gecənin Qəhrəmanı Oldu
Anfielddə Gənc Rio Ngumoha Fırtınası
Liverpulun yay transfer pəncərəsində heyətinə qatdığı ulduz futbolçular ilk dəfə Anfield stadionunda azarkeşlərin qarşısına çıxdı. Lakin bu möhtəşəm gecədə diqqətləri öz üzərinə çəkən nə Hüqo Ekitike, nə Florian Virts, nə də Məhəmməd Salah oldu. Bütün gözlər, cəmi 16 yaşlı Rio Ngumoha üzərinə yönəldi.
Rio Ngumohadan Möhtəşəm Performans
İngiltərəli gənc ulduz, Atletik Bilbao ilə oynanılan və iki fərqli on birliyin sahəyə çıxdığı hazırlıq matçlarının ilk hissəsində əsl mənada parladı. Hələ ikinci dəqiqədə öz yarı sahəsində topu qaparaq rəqib cərimə meydançasına qədər sürdüyü hücumda inanılmaz bir qola imza atan Ngumoha, üç dəqiqə sonra da Ben Doakın ötürməsində baş ilə asist edərək Darwin Nunezin qolunu hazırladı.
Liverpulun “B komandası” adlandıra biləcəyimiz heyətinin yer aldığı bu qarşılaşma 4-1 hesabı ilə başa çatdı. Qolları Ngumoha, Doak, Nunez və Harvi Elliott vurdu.
Tribunalar Ayağa Qalxdı!
Matçın ulduzu Ngumoha oyundan çıxarılarkən, Anfield stadionunda tribunalar ayağa qalxdı. Azarkeşlər onun adını qışqırarkən, komanda yoldaşı Kurtis Cons da alqışlarla ona dəstək oldu. Keçmiş Liverpul oyunçusu Qari Gillespie, LFC TV-yə verdiyi açıqlamada bunları dedi:
“Həqiqətən də fövqəladə bir istedad. Əlbəttə ki, gözləntiləri nəzarət altında saxlamaq çətindir, lakin onun yüksəlişinə mane olmaq da bir o qədər çətindir.”
Rio Ngumoha daha əvvəl də AC Milana qarşı etdiyi asist və Yokohama F. Marinosa vurduğu qolla diqqət çəkmişdi. Liverpul formasını ilk dəfə 16 yaş və 135 günlükkən FA Cupdakı Accrington matçında geyinmişdi. O matçda klub tarixinə ən gənc forma geyən oyunçu olaraq düşmüşdü.
Liverpulda Yeni Ümid: Ngumoha
Liverpul cəbhəsində hücum xəttində ciddi bir dəyişim prosesi yaşanır. Dioqo Jotanın yol qəzasında həyatını itirməsi, Luis Diasın Bayern Münhenə satılması və Darwin Nunezin Səudiyyə Ərəbistanı klublarının radarına düşməsi forvetdəki boşluğu böyüdür.
Bu vəziyyətdə Salah, Ekitike və Qakpo xaricində dəqiq bir alternativ qalmır. Məhz bu nöqtədə Rio Ngumoha kimi gənc bir ulduz üçün qapılar açılmış vəziyyətdədir. Klub əlavə olaraq Nyukasldan Aleksandr İsakı transfer etməyə çalışır. Lakin 110 milyon sterlinqlik ilk təklif rədd edildi.
‘Tələsmirəm, Baş Məşqçimə Göstərmək İstəyirəm’
Ngumoha keçən həftə verdiyi müsahibədə hələ çox gənc olduğunu və inkişaf etməyə davam etmək istədiyini vurğuladı:
“Hələ gənc olduğum üçün tələsmirəm. Amma eyni zamanda baş məşqçimə nə edə biləcəyimi göstərmək və heç vaxt arxayınlaşmamaq istəyirəm. Daha böyük işlər görmək, özümü və klubu daha irəli aparmaq istəyirəm.”
Rio Ngumoha, Liverpulun öz yetirməsi olmasa da, artıq böyük ümid vəd edir. Keçən yay Çelsidən transfer edilən gənc istedad üçün əfsanəvi futbolçu Con Terri “Bu uşaq möhtəşəm bir oyunçu olacaq” demişdi. Görünən odur ki, Terri haqlı çıxır.
24 saat
