“Qalatasaray Daikin” yeni transferləri təqdim etdi
Qalatasaray Daikin Qadın Voleybol Komandası yeni mövsüm öncəsi heyətinə qatılan oyunçular üçün imza mərasimi təşkil etdi.
RAMS Parkında baş tutan tədbirdə “Qalatasaray” Klubunun vitse-prezidenti Mehmet Cibara, idarə heyətinin üzvü Timur Kuban, qadın voleybol komandasının meneceri Neşve Büyükbayram, yeni transferlər Martyna Lukasik, Myriam Sylla, Kaja Grobelna, Alexandra Frantti və müqaviləsi yenilənən Eline Timmerman iştirak etdilər.
Mehmet Cibaranın çempionluq hədəfi
Mehmet Cibara yeni mövsüm hazırlıqlarının son mərhələdə olduğunu qeyd edərək, “Komandamız və məşqçilərimizlə yeni mövsümə böyük hədəflərlə başlayırıq. 2022-ci ildə seçildikdən sonra voleybolla bağlı planlarımız var idi. Bu plan əsasında 5 və ya 6-cı ildə çempion olmaq üçün hazırlıqlarımızı aparırdıq. Nizamnamə dəyişikliyi səbəbindən vəzifə müddətimiz 2 ilə endirildi. Buna görə də 4-cü ilimizdə bu sözümüzü yerinə yetirmək istəyirik. Keçən il yarımfinalda əldən verdiyimiz Avropa çempionluğu var. Yeni gələcək rəhbərliyə çempion komanda buraxmaq istəyirik” dedi.
Rəhbərlik olaraq seçildikdən sonra aşağı yaş qruplarında dəyişiklik etdiklərini vurğulayan Cibara, “Aşağı yaş qrupları ilə yanaşı, infrastrukturumuza da sərmayə yatırdıq. “Taç Spor”u da “Qalatasaray”a oyunçu yetişdirəcək səviyyəyə çatdırdıq. Bu il çox vacib əcnəbi ulduzları transfer etdik. CEV Kubokunda çempion olmaq istəyirik. CEV Çempionlar Liqasına da qatılmaq istəyirik. Maliyyə baxımından da büdcəmizi artırdıq. Bunu azarkeşlərimiz çox istəyirdi. Onların da Burhan Felek stadionunu doldurmasını istəyirik” söylədi.
Mehmet Cibara, Türkiyə milli oyunçusu İlkin Aydın ilə 2026-cı ilin may ayında müqaviləsinin bitəcəyini qeyd edərək, “Yanvar ayında yenidən oturub danışacağıq. İlkin çox yaxşı “Qalatasaray”lıdır. Əgər özü qalmaq istəyirsə, onunla razılaşarıq. Onsuz da apardığımız danışıqlarda meneceri ilə birlikdə bizə son dərəcə anlayışla yanaşırlar” ifadələrini işlətdi.
Timur Kubandan kombine dəstəyi çağırışı
Timur Kuban qadın voleybolunda keçən il müvəffəqiyyət qazandıqlarını bildirərək, “Bu il dünya ulduzları ilə daha da gücləndirdiyimiz sahələrdən biri voleyboldur. TAÇ İdman Kompleksi, kişi və qadın komandalarımız üçün əhəmiyyətli dəyişikliklərdən keçdi. Çox müasir bir kompleks halına gəldi. Burhan Felek İdman Salonunda da yeni bir kombine sistemimiz oldu. Bütün azarkeşlərimizin mövsüm boyu komandamıza dəstək olması üçün çox əlverişli bir mühit yaradıldı. Rekord səviyyədə başlayan bir kombine dəstəyi var. Mən, bu dəstəyin davam etdirilməsini xahiş edirəm. Çox böyük hədəflər qoyduq. Bu hədəflərə çata biləcəyimizə inanıram” şəklində fikirlərini ifadə etdi.
“Qalatasaray” Futbol Komandasının dünən “Ayntraxt Frankfurt” qarşısında yaşadığı 5-1 hesablı məğlubiyyətə toxunan Timur Kuban bunları qeyd etdi: “”Qalatasaray”, Avropa və dünyada uğurlu olmaq məqsədilə qurulub. Biz Türkiyə çempionluğunu məqsəd deyil, vasitə olaraq görürük. Dünənki oyun fərqli bir yerə gedə bilərdi. Bu oyuna baxmayaraq inancımız var. Mövsümün əvvəlində belə şeylər ola bilər. Azarkeşlərimizin inancında bir dəyişiklik olduğunu düşünmürəm. İnancın eyni şəkildə davam edəcəyinə əminəm. Bu il futbol komandamız daha da gücləndi. Göz dəyməsin deyək. Heç gözləmədiyimiz oyunlarda çox yaxşı nəticələr əldə edəcəyimizə əminəm.”
