ABŞ Prezidenti Donald Tramp, İsrail parlamentinin Qərb Sahilinin ilhaqına yönəlmiş səsverməsinə qətiyyətli cavab verib.
Tramp bəyan edib ki, “Belə bir şey olmayacaq. Olmayacaq, çünki Ərəb ölkələrinə söz vermişəm. Bunu edə bilməzlər. Ərəblərdən böyük dəstək almışıq.”
ABŞ Prezidenti əlavə edib ki, “əgər İsrail belə bir addım atarsa, ABŞ-ın bütün dəstəyini itirəcək.”
Bu açıqlama, əvvəllər İsrail Parlamentində qəhrəman kimi qarşılanan Trampın ölkəyə qarşı ən böyük xəbərdarlığı idi.
ABŞ-dan İlhaqla bağlı Sərt Xəbərdarlıq
ABŞ Dövlət Katibi Marko Rubio, İsrail parlamentinin Qərb Sahilinin ilhaqı ilə bağlı addımlarının Prezident Donald Trampın Qəzzadakı müharibəni bitirməyə yönəlmiş sülh planını təhdid edə biləcəyi barədə xəbərdarlıq edib.
Oxşar bir xəbərdarlığı ABŞ Vitse-prezidenti J.D. Vans da etmişdi. Vans bildirib ki, “Tramp belə bir planı qətiyyən dəstəkləməz.”
İsrail Geri Addım Atdı
İsrailin Xarici İşlər Naziri Gideon Sa’ar isə planın yalnız bir “ilkin səsverməyə təqdim edildiyini” və “İsrail hökumətinin dəstəyini almadan parlamentə təqdim edilməyəcəyini” vurğulayıb. O, planın sadəcə oxunduğunu qeyd edib.
Sa’ar əlavə edib ki, “Trampın sülh planına sadiqik və onun həyata keçməsi üçün əlimizdən gələni edəcəyik. Lakin Həmas plana riayət etmir.”
Ateşkəs Davamlı Pozulur
Qəzzada iki ildən çox davam edən müharibədən sonra qüvvəyə minən atəşkəs tez-tez silahlı toqquşmalar və partlayışlarla pozulub.
Tərəflər razılaşmanın ilk mərhələsindəki pozuntulara görə bir-birini günahlandırdılar. Bu mərhələdə İsrailli girovların bir hissəsi fələstinli məhbuslarla dəyişdirildi, bəzi ölmüş girovların cəsədləri təhvil verildi və İsrail qoşunları qismən geri çəkildi.
2023-cü il oktyabrın 7-də Həmasın İsrailə hücumundan sonra başlayan müharibə iki il davam etdi və hər iki tərəf də ABŞ-ın vasitəçiliyi ilə əldə olunan atəşkəsə sadiq qalacaqlarını bir daha bəyan etdi.
İsrailin məlumatına görə, hücumlarda 1200 nəfər ölüb, Qəzza Səhiyyə Nazirliyinin məlumatına görə isə İsrailin hava və quru əməliyyatlarında 68 mindən çox insan həyatını itirib.
