Qırğızıstan və Rusiya prezidentləri Ukraynanı müzakirə etdilər
Qırğızıstan Prezidenti Sadır Caparov və Rusiya Prezidenti Vladimir Putin arasında telefon danışığı baş tutub. Danışıqların əsas mövzusu Ukrayna münaqişəsi olub.
Qırğızıstan Prezident Administrasiyasının mətbuat xidmətindən verilən məlumata görə, telefon söhbəti zamanı Ukraynadakı vəziyyətlə bağlı ABŞ tərəfi ilə son vaxtlar aparılan danışıqların nəticələri barədə ətraflı məlumat mübadiləsi aparılıb.
Rusiyanın mövqeyinə dəstək
Sadır Caparov, Vladimir Putinə təqdim etdiyi məlumatlara görə təşəkkürünü bildirib. O, münaqişənin həllinə yönəlmiş siyasi və diplomatik səylərə tam dəstək verdiyini qeyd edib.
Telefon danışığı zamanı həmçinin regional və beynəlxalq münasibətlər gündəmindəki aktual məsələlər ətrafında fikir mübadiləsi aparılıb. Tərəflər beynəlxalq və regional tərəfdaşlıq çərçivəsində əməkdaşlıq imkanlarını da nəzərdən keçiriblər.