Suriya Türkiyədən Müdafiə Dəstəyi Tələb Edib
Türkiyə Milli Müdafiə Nazirliyi (MMN) mənbələri bildirib ki, Suriya rəhbərliyi İsrailin hücumları və Süveydadakı toqquşmalar səbəbindən son dövrlərdə təhlükəsizliyini təsir edən inkişaflardan sonra, müdafiə qabiliyyətinin gücləndirilməsi və terror təşkilatları ilə mübarizə üçün Türkiyədən rəsmi dəstək tələb edib.
MMN-dən verilən açıqlamada deyilir: “Nazirlik olaraq, Suriyanın yeni hökuməti ilə sıx əməkdaşlıq edirik. Suriya rəhbərliyi tərəfindən müdafiə qabiliyyətinin gücləndirilməsi və başda DEAŞ olmaqla bütün terror təşkilatları ilə mübarizə çərçivəsində Türkiyədən rəsmi dəstək tələb edilib.”
İsrail Mətbuatının Reaksiyası: “Yeni Təhdid”
İsrail mətbuatının aparıcı nəşrlərindən olan Maariv, mövzu ilə bağlı “İsrailə qarşı yeni və real təhdid: Ərdoğanın ordusu görünməmiş addımda” başlıqlı təhlili ilə belə başlayıb:
“Türkiyə Müdafiə Nazirliyi uzunmənzilli və güclü bir ballistik raketi təqdim etmələrindən bir gün sonra, Əhməd Şara (əl-Cövlanı) liderliyindəki yeni Suriya ordusuna dair niyyətlərini açıqlayıb.”
Maariv, bu xəbərin Suriya cəbhəsində son günlərdə yaşanan əhəmiyyətli inkişafların fonunda yayımlandığını vurğulayaraq əlavə edib: “Xatırladaq ki, şəhərdə toqquşmaların başlaması ilə birlikdə Suriya ordusu bölgəyə zirehli birliklər də daxil olmaqla əhəmiyyətli qüvvələr göndərmişdi. Təxminlərə görə, toqquşmalara müxtəlif briqada və birliklərdən gələn təxminən min əsgər qatılıb və yerli Dürzi yaraqlılarla qarşı-qarşıya gəlib.”
Türkiyənin Raket Sınağı və Xarici İşlər Nazirinin Sərt Bəyanatları
“Həmçinin dünən Türkiyə Xarici İşlər Naziri Hakan Fidan, İsrail və onun Suriyadakı hərəkətlərinə qarşı sərt bəyanatlar verib. Bu bəyanatlar Ankaradan gələn tonun sərtləşdiyini göstərir” ifadələri yer alan xəbər belə davam edib: “Fidan, “Ankara Suriyanın parçalanmasına yönələn hər hansı cəhdi təhdid kimi qiymətləndirir və müdaxilə etmək barədə düşünəcək. Netanyahunun məqsədi Yaxın Şərqi xaosa sürükləməkdir və biz, bölgə ölkələri olaraq buna izin verməyəcəyik. İsrail bölgəni zəiflədən və xaos içində qoyan bir siyasət yürüdür” ifadələrini işlədib.”
“Yuxarıda qeyd edildiyi kimi, Türkiyə dünən indiyədək ən güclü silahını, Roketsan tərəfindən istehsal olunan və Tayfun BLOK 4 adlanan ballistik raketini təqdim edib. Müxtəlif mənbələrə görə, raket 500-800 kilometr mənzilə çata bilir və inkişaf prosesi tamamlandıqdan sonra bu məsafənin təxminən 1000 kilometrə çatacağı gözlənilir.”
Beynəlxalq Agentliklərdən Təzyiqin Artması Xəbərdarlığı
“Türk rəsmilərinin çərşənbə günü verdiyi açıqlamaya görə, Suriya müvəqqəti hökuməti, son iki həftədə ölkədə artan məzhəblərarası zorakılıqdan sonra müdafiə qabiliyyətlərini gücləndirmək məqsədilə Türkiyədən dəstək tələb edib” ifadələrinə yer verən Associated Press (AP) xəbər agentliyi isə AK Partiya sözçüsü Ömər Çelikin “Həm Suriyalı qardaşlarımıza kömək etmək, həm də Türkiyənin milli təhlükəsizliyi baxımından həyati əhəmiyyət kəsb edən regionda qeyri-sabitliyin qarşısını almaq üçün lazımi addımların atılacağı” sözlərinə yer verib.
Agentliyin xəbərində “Suriyadakı mövcud vəziyyət Türkiyə ilə İsrail arasındakı gərginliyi də artırıb” deyilir: “Aprel ayında İsrail Suriyada beş şəhərə hücum edib. Bunlar arasında Türkiyənin hərbi varlığını saxlamaq istədiyi Hama şəhərindəki strateji hərbi baza yaxınlığına edilən çoxsaylı hücumlar da olub. İsrail Türkiyəni Suriyada “protektorat” (yəni “himayə bölgəsi” və ya “qoruyucu ərazi”) qurmağa cəhd etməkdə ittiham edib.”
ABC News: ABŞ-ın aparıcı xəbər kanallarından ABC-nin internet saytı “Məzhəb toqquşmaları fonunda Suriya Türkiyədən müdafiə dəstəyi istədi” başlığı ilə xəbər verib:
“Uzun müddətdir Suriyaya kömək etməyə hazır olduğunu bildirən Türkiyənin, bu ölkənin müdafiə qabiliyyətini artırmaq məqsədilə təlim, məsləhət xidmətləri və texniki dəstək göstərmək istiqamətində işlər apardığı bildirilib. Suriya rəsmilərindən hələlik şərh alınmayıb.”
News.am: Ermənistan mərkəzli xəbər saytı “Müvəqqəti Suriya hökuməti, son iki həftədə ölkədə məzhəb əsaslı zorakılığın artmasından sonra, müdafiə qabiliyyətlərini gücləndirmək məqsədilə Türkiyədən dəstək tələb etdi. Bu inkişaf Suriyadakı gərginliyi artıraraq İsrailin müdaxiləsinə də səbəb olmuşdu” ifadələrinə yer verib.
24 saat
