Şoumen Mehmet Ali Erbil (68) özündən 42 yaş kiçik Gülseren Ceylanla sadə bir nikah mərasimi ilə ailə həyatı qurub. İstanbulda baş tutan mərasimə cütlüyün yaxın dostları qatılıb. Bu, Erbilin altıncı evliliyi olub.
Nikah Şahidi Serdar Ortaç Mərasimə Gələ Bilmədi
Cütlüyün nikah mərasimində Erbilin övladları Sezin Erbil Yazqan, Yasmin Erbil və Ali Sadi Erbil də iştirak ediblər.
Mehmet Ali Erbil nikah şahidi olaraq müğənni Serdar Ortaçı seçsə də, o, mərasimə qatıla bilməyib. Məlum olub ki, Ortaç mərasimə “yuxuda qaldığı” üçün gəlməyib. Nikahdan sonra media nümayəndələrinin suallarını cavablandıran Erbil, Ortaç haqqında kəskin ifadələr işlədib:
“Onda mənəviyyat yoxdur. Ömrü boyu tək və yalnız qalacaq.”
Erbilin bu açıqlaması sosial mediada qısa müddətdə gündəmə gəlsə də, Serdar Ortaç tərəfindən hələlik bir cavab verilməyib. Cütlüyün ailə həyatı qurmazdan əvvəl izdivac müqaviləsi imzaladığı da iddia edilir.
Erbilin Keçmiş Evlilikləri
Tanınmış şoumen indiyə qədər beş dəfə ailə həyatı qurub. Üç övladı olan Erbil, 1980 və 1985-ci illərdə Muhsinə Şehnaz Kamiloğlu ilə iki dəfə evlənib. Bu evlilikdən Sezin Erbil adlı bir qızı dünyaya gəlib.
Erbil, məşhur aktrisa Nərgiz Kumbasar ilə 1989-cu ildə üçüncü dəfə nikah masasına oturub. Cütlüyün bu evlilikdən Yasmin Erbil adını verdikləri bir qızları var. Şoumen 2001-ci ildə evləndiyi Sədəf Altıntaşdan isə 2003-cü ildə boşanıb. Ən son Tuğba Coşqunla evlənən Erbilin bu evlilikdən Əli Sadi Erbil adlı oğlu dünyaya gəlib. Cütlük 2011-ci ildə qarşılıqlı razılıqla boşanıb.
