FED BİNASININ TƏMİR QİYMƏTİ ÜZƏRİNDƏ GƏRGİNLİK KƏSKİNLƏŞDİ
ABŞ prezidenti Donald Tramp ilə Federal Ehtiyat Sistemi (Fed) rəhbəri Cerom Pauell arasında yaranan gərginlik, bu dəfə qurumun binasının milyardlarla dollarlıq təmir xərcləri üzərindən kəskinləşib. Uzun müddətdir yüksək faiz dərəcələrinə görə Fedi hədəf alan ABŞ prezidenti Donald Tramp, Federal Ehtiyat Sisteminin Vaşinqtondakı mərkəzi qərargahına gözlənilməz bir səfər edib.
“BU BİNA NƏ QƏDƏRƏ BAŞA GƏLİB?”
Donald Tramp Federal Ehtiyat Sistemi binasının tikinti xərclərinin 3,1 milyard dollara çatdığını iddia edib. Fed rəhbəri Cerom Pauell isə bu rəqəmin həqiqəti əks etdirmədiyini bildirib. Pauell, Trampın ona uzatdığı sənəddəki xərcə beş il əvvəl tamamlanmış başqa bir binanın da daxil edildiyini qeyd edib. Lakin ABŞ prezidenti Donald Tramp, bu binanın da kompleksin bir hissəsi olduğunu vurğulayaraq, xərcləri tənqid etməyə davam edib.
ABŞ prezidenti “Fed bina inşaatı üçün 2,7 milyard dollar istəyirdi. İndi bu rəqəm 3,1 milyarda çatıb,” deyərək Federal Ehtiyat Sisteminin xərclərini sorğu-sual edib. Pauell isə “Bu rəqəmdən mənim xəbərim yoxdur,” sözləri ilə cavab verib. Sənədi yoxlayan Fed rəhbəri, “Beş il əvvəl bitən binanın xərcini də yazıblar,” dedikdə Tramp, “Olsun, bu kompleksin hissəsidir,” deyərək təkidini davam etdirib.
ABŞ-IN MÜHÜM SİMALARI ORADA İDİ
Səfərdə Fed rəhbəri Cerom Pauell ilə yanaşı, senatorlar Tim Skott və Tom Tillis, Ağ Evin Büdcə Direktoru Rassell Vout, Federal Mənzil Maliyyə Agentliyinin Direktoru Vilyam Pulte və ABŞ prezidenti Donald Trampın təyin etdiyi bəzi memarlıq məsləhətçiləri də iştirak ediblər.
Donald Tramp binadakı işləri yerində yoxladıqlarını bildirərək, əvvəllər mövcud olmayan zirzəmi qatlarının tikilərək genişləndirildiyini qeyd edib. “Çox bahalı bir işdir, buna şübhə yoxdur,” deyən Tramp, xərclərin şəffaf şəkildə araşdırılmasını tələb edib. Federal Ehtiyat Sisteminin idarəetmə xərclərinin hər zaman ictimaiyyətə açıq olması vacibliyini vurğulayıb.
“MƏN OLSAYDIM İŞDƏN ÇIXARARDIM”
Əmlak sektorundan gəldiyini xatırladan ABŞ prezidenti Donald Tramp, büdcəni aşan bir layihə rəhbərinə nə edəcəyi ilə bağlı suala, “Ümumiyyətlə desək, onu işdən çıxarardım,” cavabını verib. O, belə maliyyə idarəçiliyinin heç bir qurumda, o cümlədən Feddə qəbuledilməz olduğunu bildirib.
YENƏ DÜŞÜK FAİZ İNADINDAN VAZ KEÇMƏDİ
Səfərdə diqqət çəkən əsas məsələlərdən biri də yenə faiz dərəcələri olub. ABŞ prezidenti Donald Tramp, Pauellə qarşı əvvəlki sərt tənqidlərini xatırlatmaq istəmədiyini desə də, faiz dərəcələrinin aşağı düşməsini çox istədiyini bir daha vurğulayıb. Onun fikrincə, Federal Ehtiyat Sisteminin siyasəti ölkə iqtisadiyyatının daha sürətli inkişafına mane olur.
Donald Tramp “Şura bu barədə necə qərar verəcəyini yaxın zamanlarda görəcəyik,” deyib. Yaponiya və Avropa İttifaqı ilə aparılan ticarət razılaşmalarına da toxunan ABŞ prezidenti, aşağı faiz dərəcələrinin bu razılaşmalara töhfə verəcəyini və Amerika məhsullarının beynəlxalq bazarda daha rəqabətli olacağını ifadə edib. O, ölkənin ümumi faiz dərəcələri siyasətini daha yumşaq görmək istədiyini dilə gətirib.
Bina xaricində mətbuat mənsublarına da danışan Tramp, bütün ölkələr arasında ən aşağı faiz dərəcəsinə sahib olunması lazım olduğunu söyləyib. Yüksək faiz dərəcələrinin ev alqı-satqısını çətinləşdirdiyini vurğulayan Donald Tramp, Fed binasındakı lüks təmirlərin də xərcləri artırdığını ifadə edib. O, Federal Ehtiyat Sisteminin bu qədər böyük xərclərə getməsinin iqtisadiyyat üçün yaxşı bir siqnal olmadığını əlavə edib.
Tramp, Pauell ilə məhsuldar bir görüş keçirdiklərini bildirib. Pauelli nəyə görə hələ də vəzifəsindən azad etmədiyi sualına isə, “Bunu etmək böyük bir addımdır. Bunun vacib olduğunu düşünmürəm. Federal Ehtiyat Sisteminin rəhbərinin doğru addımı atacağına inanıram,” şəklində cavab verib.
Leave a Reply