Hamiləliyin 21-ci Həftəsində Başlayan Dramatik Doğuş
Randall Kin, doğuş ağrıları ilə xəstəxanaya gələn həyat yoldaşı Mollie Kinin üzündə böyük bir narahatlıqla ona kömək edirdi. Çünki həyat yoldaşının doğuş sancıları 2024-cü il iyulun 5-də, hamiləliyin yalnız 21-ci həftəsində başlamışdı. Həkimlər Mollie-nin uşağı itirəcəyinə qərar verdilər və dərhal əməliyyat hazırlığına başladılar.
Lakin Kin ailəsinin balaca oğlu Nash Keen göstərdiyi dözümlülüklə təkcə həkimləri deyil, bütün dünyanı heyrətləndirdi.
Balaca Nash Tarix Yazdı: Dünyanın Ən Erkən Doğulan İnsanı
Doğulması lazım olan tarixdən 133 gün əvvəl dünyaya göz açan Nash, bu gün bir yaşına basaraq “ən erkən doğulan insan” kimi tarixə düşdü.
Körpə Nashın doğuşu Ayova Universiteti Xəstəxanasında baş verdi. Doğulduğu zaman cəmi 285 qram çəkisi və 24 santimetr boyu vardı. Atasının əlindən də balaca, bir siçandan da yüngül idi.
Kiçik Nashın yaşadığına inana bilməyən həkimlər dərhal hərəkətə keçdilər. O, vaxt itirilmədən xəstəxananın ən müasir yenidoğulmuşlar üçün intensiv terapiya şöbəsinə yerləşdirildi.
Neonatoloq Dr. Emi Stenford qeyd etdi ki, “21 həftəlik körpəyə qulluq etmək adi erkən doğuş hallarından qat-qat fərqlidir. Hər saat kritik əhəmiyyət kəsb edir.”
İlk həftələr gücdən düşsə də, Nash fövqəladə dözümlülük göstərdi və kiçik addımlarla da olsa sağalmağa başladı. Anası tərəfindən “balaca kartof” ləqəbi verilən Nash, bütün çətinliklərə rəğmən həyata tutundu.
Anaya Ümid Verən Kiçik Həyat Qığılcımı
Ana Mollie ilk günlərin qorxu, qeyri-müəyyənlik və kiçik bir ümid qarışığı ilə dolu duyğu burulğanı içində keçdiyini söylədi.
Mollie Kin bildirib: “Ətrafımızda maşınlar, monitorlar və tibbi terminlər var idi. Lakin bu qarışıqlığın içində, onun içindəki minicik bir həyat qığılcımı bizə ümid bəxş etdi.”
Oğlunu ilk dəfə qucağına alması Mollie üçün unudulmaz bir an oldu. Ana Mollie bu anı belə təsvir etdi: “Üzərində kabellər və cihazlar var idi. Sinəmdə olduğunu demək olar ki, hiss etmirdim, amma o an bütün gərginliyim yox oldu.”
Bütün Çətinliklərə Rəğmən Sağlam Böyüyən Bir Qəhrəman
Nash altı ay xəstəxanada qaldıqdan sonra 2025-ci ilin yanvarında evə qayıda bildi. Hələ də oksigen dəstəyi alır, qidalanma borusundan istifadə edir və yüngül eşitmə qabiliyyəti itkisi üçün eşitmə aparatı taxır. Lakin balaca Nash Keen, hər ötən gün daha da güclənir, ətrafına daha çox reaksiya verir. Terapiyalar, bir yaşına girən Nashın sağlam böyüməsini təmin edir.
Anası oğlu haqqında dedi: “Nash Keen sadəcə rekor qıran bir körpə deyil. O, eyni zamanda qəlbləri fəth edən biridir. Başından bəri həm sevdiklərimizdən, həm də tanımadığımız insanlardan böyük bir dəstək gördük.”
Xəstəxana heyəti də Nashın inkişafını qürurla izləyir. Dr. Stenford vurğuladı: “Nash yalnız öz tarixini yazmaqla qalmır, onun kimi ən erkən doğulan insanlar üçün də ümid işığı olur.”
Leave a Reply to Fidan Nəsirova Cancel reply