Merz İsrail və ABŞ-ın addımlarını dəstəkləyir
Alman Sənayeçilər Birliyinin təşkil etdiyi "2025 Sənaye Günü" tədbirində çıxış edən Merz, Birləşmiş Ştatlar və İsrailin İrana qarşı əməliyyatlarını dəyərləndirib. Merz bəyan edib ki, nə İsrailin bir həftə əvvəl başladığı fəaliyyəti, nə də Amerikanın keçən həftə sonu həyata keçirdiyi əməliyyatları tənqid etmək üçün heç bir səbəb yoxdur.
Almaniya Baş naziri, mövcud vəziyyətin risksiz olmadığını vurğulayaraq, "Vəziyyəti olduğu kimi saxlamaq da bir seçim deyil" deyib.
Regional vəziyyət və Hürmüz boğazı riski
O, İranın siyasi rəhbərliyinin, silahlı qüvvələrinin və
İnqilab Keşikçiləri Qvardiyasının gücünü tam qiymətləndirməyin çətin olduğunu bildirib. Onun fikrincə, İranın müqavimətinin gözləniləndən daha aşağı olması və ona bağlı qruplar ilə milislərin nisbətən az reaksiya göstərməsi ümidverici iki inkişafdır.
Bölgədəki ən həssas nöqtələrdən birinin Hürmüz boğazı olduğuna diqqət çəkən Merz, "Dünya enerji təchizatının demək olar ki, yüzdə əllisi buradan keçir. Əgər bu bölgə münaqişə səbəbindən bağlanarsa və ya keçid təhlükəli hala gələrsə, gözləmədiyimiz dolayı nəticələrlə üzləşə bilərik. Vəziyyət qeyri-müəyyəndir. Daha böyük inkişafların yaşanmayacağını ümid edirəm, lakin bunu qəti şəkildə söyləmək üçün hələ tezdir" ifadələrini işlədib.
İranın nüvə proqramı və terror iddiaları
Merz, İranın dünyanın bir çox yerindəki milisləri maliyyələşdirdiyini bildirərək, "İran dünyanın terror rejimidir" iddiasında bulunub.
Almaniya Baş naziri, dünyada heç bir ölkənin nüvə stansiyaları üçün 60% və ya daha yüksək səviyyədə zənginləşdirilmiş urana ehtiyacı olmadığını vurğulayıb: "Heç kimə. Çox daha aşağı zənginləşdirmə dərəcələri ilə işini görə bilər. Həmçinin, dinc məqsədlər üçün uran zənginləşdirmək üçün yerin 100 metr altında yerləşən sığınacaqlara ehtiyac yoxdur. Tehranın nüvə bombası düzəltməyə çalışdığına dair əlamətlər həftələr, aylar, hətta illərdir açıqdır."
İsrailin əməliyyatlarına Almaniya dəstəyi
Merz, İranın keçən həftə sonu obyektlərdən uranı çıxararaq başqa yerlərə daşımağa çalışdığını, İsrailin hücum qərarının və ABŞ-ın sığınacaqları deşən silahlarla müdaxilə etmək qərarının bu vəziyyətə reaksiya olduğunu iddia edib. O, "İranın nüvə silahı istehsal etmə yolunda irəlilədiyinə dair dəlillər artıq ciddi şəkildə inkar edilə bilməz. Bu, normal jurnalistik məlumatla belə başa düşülə bilər" ifadələrini istifadə edib.
İran rejiminin xüsusilə demokratik və açıq cəmiyyətlərin azadlığını təhdid etdiyini müdafiə edən Merz, "Bu səbəbdən keçən həftə Kanadada da dediyim kimi, İsrailin bizim üçün vacib bir vəzifəni yerinə yetirdiyinə inanıram. İsraili tənqid etməyənlərdən deyiləm. 2-3 həftə əvvəl Qəzzada yaşanan humanitar fəlakətlə bağlı aydın sözlər söyləmişəm" deyib. Aparıcının "çirkli iş" ifadəsini yenidən istifadə edib-etməyəcəyini soruşmasına, o, "Mən elə dedim, təkrarlamağa ehtiyac yoxdur. Onlar (İsrail) bizim maraqlarımıza uyğun olan doğru bir iş görürlər" cavabını verib.
24 saat
