Avroviziyada İsrail qalmaqalı böyüyür: Ölkələr iştirakdan imtina edir

İsrailin iştirakı səbəbindən Eurovision 2026 təhlükə altındadır

Bir çox ölkənin ictimai yayım təşkilatı, Qəzzada soyqırıma davam edən İsrailin 2026-cı il Eurovision Mahnı Müsabiqəsinə qatılmasına icazə veriləcəyi təqdirdə öz ölkələrinin yarışmaya qatılmayacağını elan edib. İspaniyanın mədəniyyət naziri Ernest Urtasun milli televiziya kanalına verdiyi açıqlamada, İsrailin Eurovision-da iştirak edəcəyi təqdirdə konkret addımların atılmalı olduğunu vurğulayaraq, ölkəsinin müsabiqəyə qatılımını şübhə altına aldığını bildirib.

Urtasun, yekun qərarı İspaniyanın dövlət televiziyası RTVE-nin verəcəyini qeyd edərək, İspaniyanın daha əvvəl İsrailin yarışmadan kənarlaşdırılmasını rəsmi olaraq tələb etdiyini xatırladıb.

İrlandiya, Sloveniya və Hollandiya qəti mövqe nümayiş etdirir

İrlandiyanın ictimai yayım təşkilatı RTE də İsrailin iştirakına icazə veriləcəyi təqdirdə ölkəsinin yarışmaya qatılmayacağını açıqlayıb. RTE-nin bəyanatında, iyul ayında Avropa Yayım Birliyi (EBU) başqanağında bir çox üzvün İsrailin Eurovision-da iştirakı ilə bağlı narahatlıqlarını dilə gətirdiyi bildirilib. EBU-nun başlatdığı məsləhətləşmələr və cəzasız şəkildə yarışdan çəkilmə müddətinin uzadılmasından məmnuniyyət ifadə olunan bəyanatda, "İsrailin iştirak etməyə davam edəcəyi təqdirdə İrlandiyanın 2026-cı il Eurovision Mahnı Müsabiqəsində iştirak etməyəcəyini, yekun qərarı EBU-nun qərarından sonra verəcəyimizi elan edirik" ifadəsi istifadə edilib.

Qəzzadakı insan tələfatı qarşısında İrlandiyanın yarışmaya qatılmasının "vicdansızca" olacağı vurğulanıb. Sloveniya ictimai yayım təşkilatı RTV də gələn il İsrailin müsabiqəyə daxil ediləcəyi təqdirdə Sloveniyanın Eurovision-a qatılmayacağını açıqlayıb. RTV-nin bəyanatında bu qərarın Fələstin xalqı ilə həmrəylik üçün alındığı qeyd olunub.

Hollandiyanın ictimai yayımçısı AVROTROS-dan verilən açıqlamada, İsrailin yarışmaya qatılması halında Hollandiyanın iştirakının "mümkün olmadığı" bildirilib. Açıqlamada, "Qəzzada davam edən ciddi əzablara baxmayaraq, belə bir vəziyyətdə İsrailin iştirakı haqlı göstərilə bilməz" ifadələrinə yer verilib.

İslandiya və Belçikanın münasibəti

İslandiya yayım təşkilatı RUV-dan edilən açıqlamada, İsrailin Eurovision-a qatılması durumunda İslandiyanın iştirakını şübhə altına alacağı bildirilib. Açıqlamada, İslandiyanın Qəzzadakı insani vəziyyəti nəzərə alaraq, Avropadakı yarışmaya dair ümumi mövqeyə daxil olacağı qeyd edilib.

Gələn il keçiriləcək yarışmaya İsrailin qatılması ilə bağlı narahatlıqları olan Belçika da öz iştirakı ilə bağlı qərarını dekabrda verəcəyini açıqlayıb. Belçikanın Flamanca yayımlanan ictimai televiziyası VRT-nin bəyanatında, Eurovision Mahnı Müsabiqəsindən İsrailin iştirakı səbəbindən çəkilən ölkələrin mövqeyinin paylaşıldığı və dəstəkləndiyi qeyd edilib.

24 saat