BLOK3 konsertində şok anlar: Təklif rədd edildi, üzük məcburən taxıldı

Ünlü repçi BLOK3-ün verdiyi son konsertlərdən birində, gözlənilməz və səs-küylü bir evlilik təklifi hadisəsi yaşanıb. Səhnəyə çıxan gənc bir oğlan sevgilisini də özü ilə gətirib. BLOK3 ilə qısa salamlaşmadan sonra, gənc qız sevgilisinin anidən diz çökərək cibindən parıldayan bir üzük çıxarması ilə böyük təəccüb yaşayıb. Bu mənzərə konsertin gedişatına xüsusi bir rəng qatıb. Qız əl hərəkətləri ilə qəti şəkildə “Xeyr” işarəsi versə də, diz çökmüş gənc oğlan israrlı şəkildə üzüyü ona doğru uzatmağa davam edib. Həmin anda səhnədə olan BLOK3 vəziyyətə müdaxilə edərək, tamaşaçılardan dəstək istəyib. Mikrofonu götürən repçi, "Mənimlə birlikdə hamınız "Bəli" deyəcəksiniz!" deyə zalı coşdurub.

Kütləvi "Bəli" təzyiqi

Repçinin çağırışından sonra konsert salonunda toplaşan minlərlə tamaşaçı xorla "Bəli, bəli!" deyə qışqırmağa başlayıb. Bu kütləvi təzyiq altında qalan gənc qız yenidən mikrofonu götürüb əl hərəkətləri ilə öz etirazını bildirməyə cəhd etsə də, oğlan onun əlini tutaraq üzüyü barmağına taxmağı bacarıb. Konsert səhnəsində yaşanan bu maraqlı anlar, kameralar tərəfindən lentə alınıb və qısa zamanda sosial mediada yayılıb. Hadisə sosial şəbəkələrdə qızğın müzakirələrə səbəb olaraq, minlərlə istifadəçinin şərhinə yol açıb. Qeyri-adi evlilik təklifinin məcburi şəkildə baş tutması, etik dəyərlər və fərdi iradə azadlığı mövzusunda müxtəlif fikirlərin səslənməsinə səbəb olub.

24 saat