Hacıosmanoğlu UEFA və FİFA-nı İsrailə səslədi

Türkiyə Futbol Federasiyasından İsrail üçün men tələbi

Türkiyə Futbol Federasiyasının (TFF) rəhbəri İbrahim Hacıosmanoğlu, İsrail-in bütün idman yarışlarından kənarlaşdırılması üçün FİFA, UEFA və dünyanın hər bir futbol federasiyasının rəhbərinə məktub göndərərək çağırış edib.

Hacıosmanoğlu göndərdiyi məktubda futbolun hər zaman bir idman növündən daha artıq məna daşıdığını qeyd edib: "Futbol, fərqli mədəniyyətləri bir araya gətirən, dostluğu möhkəmləndirən və insanlar arasındakı həmrəylik bağlarını gücləndirən ümumbəşəri bir dildir. Bu dəyərlərdən çıxış edərək İsrail tərəfindən Qəzza və ətrafında həyata keçirilən qanunsuz (və daha da əhəmiyyətlisi, tamamilə qeyri-insani və qəbuledilməz) vəziyyət qarşısında dərin narahatlığımızı ifadə etməyi zəruri hesab edirik."

Hacıosmanoğlunun men çağırışı və əsaslandırmaları

İsrail tərəfindən Qəzza və ətrafında davam etdirilən qanunsuz, qeyri-insani və qəbuledilməz vəziyyət barədə çağırış etdiyini bildirən Hacıosmanoğlu, məktubunda aşağıdakı fikirlərə yer verib: "Vəziyyət uzun zamandır ümidsiz idi, lakin son günlərdə müxtəlif qurumların müdaxilələri ilə aktuallıq səviyyəsi yeni bir mərhələyə yüksəlib:

- Çərşənbə axşamı, iki illik araşdırmadan sonra Birləşmiş Millətlər Təşkilatının müstəqil komissiyası, İsrail-in Qəzza zolağında fələstinlilərə qarşı soyqırım törətdiyini təsdiqləyib və İsrail ilə bütün dövlətlərə soyqırımı dayandırmaq və günahkarları mühakimə etmək istiqamətində beynəlxalq hüquq öhdəliklərini yerinə yetirməyə çağırıb.

- Çərşənbə günü, Avropa Komissiyasının sədri Ursula von der Leyen, İsrail ilə ticarət imtiyazlarının dayandırılmasını və sanksiyalar tətbiq edilməsini tələb edib.

- Bu həftənin əvvəlində minlərlə aktyor, rejissor, musiqiçi və digər əyləncə sənayesi peşəkarı, Fələstin xalqına qarşı soyqırım və 'aparteid' həyata keçirməkdə ittiham olunan İsrail film qurumları ilə əməkdaşlıq etməməyi öhdəsinə götürən yeni bir bəyannamə imzalayıb.

- Həftələrdir ki, dünya miqyasında hökumətlər soyqırımı pisləyir və İsrail-ə qarşı sanksiyalar tətbiq edilməsini tələb edir.

- İllərdir humanitar yardım təşkilatları İsrail-in əməllərinin səbəb olduğu ölüm və əzabları gündəmə gətirir.

- Bu müddətdə hər gün daha çox günahsız insan (uşaqlar, səhiyyə işçiləri, münaqişəni işıqlandıran jurnalistlər, peşəkar futbolçular və azarkeşlər) həyatını itirir."

"Dərhal men edilməlidir"

FİFA və UEFA-nın Rusiyanı Ukraynaya başladığı müharibədən cəmi dörd gün sonra beynəlxalq idman təşkilatlarından kənarlaşdırdığını, lakin Fələstin məsələsində eyni münasibət və tədbirlərin tətbiq olunmadığını vurğulayan Hacıosmanoğlu, "Özlərini sivil dəyərlərin və sülhün müdafiəçisi kimi təqdim etmələrinə baxmayaraq idman dünyası və futbol qurumları çox uzun müddətdir susur. Artıq FİFA və UEFA-nın hərəkətə keçmə vaxtı çatıb. İsrail, bütün idman yarışlarından dərhal men edilməlidir", - deyə qiymətləndirib.

Qəzzadakı Səhiyyə Nazirliyindən verilən açıqlamada, İsrail-in Qəzza zolağına 2023-cü il oktyabrın 7-dən bəri təşkil etdiyi hücumlarda həyatını itirənlərin sayının 65 min 502-yə, yaralıların sayının isə 167 min 376-ya yüksəldiyi qeyd olunub.

24 saat