Kraliça Kamilla ilə evlərini ayırdığı məlum olan Böyük Britaniya Kral Çarlzın da 'inziva evi' ortaya çıxıb. Lakin Kraliça Kamilla İngiltərədəki dəbdəbəli villasında qalarkən, Kral Çarlz əfsanəvi Drakula ilə əlaqəli bölgəni seçib.
The Washington Post-a öz iqamətgahının qapılarını açan Kral Çarlz Rumıniyanın Transilvaniya bölgəsində, şəhərdən uzaq bir malikanədəki həyatını gözlər önünə sərir.
Xərçənglə mübarizə aparan, nağılabənzər evliliyi tədricən zədələnən yorğun monarx, vəzifələrindən istirahət etdiyi anlarda bu təbiətlə iç-içə iqamətgahda bir qədər də olsa dinclik tapır.
Kral Çarlzın günlərini, həftələrini keçirdiyi təvazökar evin fotoları onun dünyagörüşünü və şəxsiyyətini nümayiş etdirir.
Sobanın Önündə Bir Monarx
Kral iqamətgahındakı otaqlar heyrətamiz dərəcədə sadədir. Burada internet yoxdur, televizor yoxdur, lakin 17-ci əsrə aid odun sobası var.
Yataq otağının ortasında taxta çarpayı var. Divarda və qapının üstündən isə anası Kraliça II. Elizabetin portreti asılıb.
Qapıdan kənara çıxanda isə bu sadəliyin mənası daha asan anlaşılır. Kralın dünyasını görmək istəyənlər Rumıniyada üç millik torpaq yolu aşaraq, təbiətlə iç-içə olan iqamətgahı görmələri kifayətdir.
Yolun sonunda çiçək tarlaları və pastel rəngli evlərlə əhatə olunmuş kənddə 1 nömrəli evə çatılır. Ziyarətçiləri qarşılayan kəndlilər, meşənin dərinliklərində yerləşən kənddə bəzən ayıların göründüyü xəbərini verirlər. Bu xəbərdarlıq adətən təhdiddən daha çox axşam gəzintisini təxirə salmaq üçün bir məsləhət kimi qəbul olunur.
Zamanın Dayandığı Kəndlə Bağlılıq
Kral Çarlz dörddəbir əsrdən çoxdur ki, müntəzəm olaraq ziyarət etdiyi Transilvaniyanın bu ritminə öyrəşib. Böyük Britaniya kralı hər yorulanda Rumıniyanın bu unudulmuş kəndinə geri dönür.
Kənd küçələrində hələ də at arabaları dolaşır. Tarlalarda oraq səsləri eşidilir. Yaxın dostu qraf Tibor Kalnoki bu bağlılığı belə izah edir: “O, öz inancının bir çoxunu burada tapır. İyirmi beş ildən artıqdır ki, bura gəlməsi belə, hər şeyi izah edir.”
Təbiətdən Aldığı Dəstək və Yaşıl Miras
Kral Çarlz bu il tez-tez dünya səhnəsində yer alıb. Polşada Auşvits həbs düşərgəsinin 80 illik anım mərasimində iştirak edib. Vatikanda Papa Fransisklə görüşüb. Ukrayna Prezidenti Zelenski ilə Sandringemdə danışıqlar aparıb. Kanadada parlamenti açıb.
Lakin Kral Çarlzın dinclik tapdığı yeganə yer Transilvaniyadakı evi olub. O, burada həm təbiətə sığınır, həm də bağçasında vaxt keçirir.
Kralın mülklərindən birindəki məlumat lövhəsində qeyd olunur ki, Transilvaniyanın yalnız bu bölgəsində 1200 bitki növü mövcuddur.
Charles illər əvvəl Buxarest Universitetində etdiyi çıxışda İngiltərənin kənd irsini itirməsinin böyük bir səhv olduğunu bildirmişdi. Kral Çarlz öz ölkəsində tapa bilmədiyi bu bağı Rumıniyada yaşamağa çalışır.
Oxucu Şərhləri
Şərh Yaz