Pens "Epstein İşi" Sənədlərinin Açıqlanmasını Tələb Edir
2025-ci ilin iyul ayında keçmiş ABŞ vitse-prezidenti Mayk Pens ABŞ prezidenti Donald Trampın rəhbərliyindən Cefri Epsteinin cinayət işi ilə bağlı bütün sənədlərin açıqlanmasını tələb edib. Pens vurğulayıb ki, şəffaflıq vaxtı gəlib, lakin zərərçəkənlərin adları mütləq qorunmalıdır. O, CBS News-a verdiyi müsahibədə bildirib ki, "Cefri Epsteinin istintaqı və təqibi ilə bağlı bütün faylları administrasiyanın açıqlamağının vaxtı çatıb. Zərərçəkənlərin adlarını qorumaq vacibdir. Onlar hər hansı açıqlamadan kənarlaşdırılmalıdır."
ABŞ prezidenti Donald Trampın mövqeyi və siyasi iddialar
Bu çağırışlar ABŞ prezidenti Donald Trampın məsələyə kəskin fərqli yanaşma sərgilədiyi vaxta təsadüf edir. Tramp Oval Ofisdə Epsteinin əlaqələri ətrafındakı araşdırmaları siyasi motivli adlandıraraq "böyük fırıldaq" kimi rədd edib. O, bunun dörd ildir ki, "Demokratlar tərəfindən başladıldığını və idarə olunduğunu" iddia edib. ABŞ prezidenti hətta bəzi "axmaq Respublikaçıların" Demokratların işini gördüyünü də bildirib. Daha əvvəl Truth Social platformasındakı paylaşımında Tramp "Cefri Epstein İşi Fırıldağı"nın "dəli solçular tərəfindən aldadılmış" "keçmiş tərəfdarları" tərəfindən istifadə edildiyini yazıb və "artıq onların dəstəyini istəmədiyini" bəyan edib.
Pensin cavabı və Ədliyyə Nazirliyinin araşdırması
Mayk Pens məsələnin siyasi motivli olması ilə bağlı iddiaları rədd edib. O, qeyd edib ki, "Cefri Epsteinin təqibi Buş administrasiyası dövründə başlayıb və Obama illərində davam edib". Pensə görə, "zərərçəkənlərin adları qorunduğu təqdirdə, bu administrasiyanın Cefri Epstein İşi ilə bağlı bütün sənədləri açıqlamaması üçün heç bir səbəb yoxdur." Keçən həftə ABŞ Ədliyyə Nazirliyi Epstein işi ilə bağlı araşdırması nəticəsində 1000-dən çox zərərçəkənin müəyyən edildiyini bildirmişdi. Araşdırma həmçinin Epsteinin 2019-cu ilin avqustunda Manhettendəki həbsxanada intihar etdiyi qənaətinə gəlib. İstintaq "müştəri siyahısı"nın mövcudluğuna və ya Epsteinin tanınmış şəxsləri şantaj etdiyinə dair heç bir dəlil tapmamışdı. Pens sözlərini belə yekunlaşdırıb: "Məncə, faktları Amerika xalqına çatdırmalıyıq və mən həmişə şəffaflığa inanmışam."
Vitse-prezident Pensdən ABŞ prezidenti Donald Trampın Federal Ehtiyat Sisteminin sədri Jerom Pauelli vəzifədən kənarlaşdırma niyyəti ilə bağlı siqnalları barədə də soruşulub. Mayk Pens cavabında bildirib: "Mən illərdir FED-in tənqidçisi olmuşam. Federal Ehtiyat Sisteminin həm dolları qorumaq, həm də tam məşğulluğu təmin etmək kimi ikili mandatı ilə bağlı ciddi narahatlıqlarım var." Bununla belə, Pens iqtisadi çətinliklərin "FED-ə deyil, daha çox administrasiyanın siyasətlərinə bağlı olduğunu" qeyd edib və ilk Tramp dövründə gömrük rüsumlarının necə idarə olunduğunu xatırladıb: "Biz ticarət maneələrini aradan qaldırmaq və bazarları açmaq üçün gömrük rüsumlarından və onların tətbiqi təhlükəsindən istifadə edirdik." CBS News-un məlumatına görə, ABŞ prezidenti Donald Tramp çərşənbə axşamı axşam Oval Ofisdə keçirilən qapalı görüşdə Respublikaçı qanunvericilərdən Jerom Pauelli səlahiyyət müddəti bitmədən vəzifədən azad edib-etməməsi barədə soruşub. Tramp çərşənbə günü deyib: "Onların demək olar ki, hamısı bunu etməli olduğumu bildirdi, lakin mən onlardan daha mühafizəkaram."