Mövcud olmayan qadınlara sevgi

Keçən çərşənbə axşamı 89 yaşında dünyasını dəyişən Hollivud aktyoru Robert Redford ABŞ-da siyasətdən sənətə qədər müxtəlif sahələrdə xoş sözlərlə anıldı. O, kinoya böyük əmək vermişdi. Lakin onun geridə qoyduğu irs sadəcə sənətlə məhdudlaşmırdı; filmlərdəki sevgilərini real həyata daşımayan, evliliyinə və həyat yoldaşına sadiq qalan məşhur bir kişi haqqında xatirələr də qalmışdı. Həyatda iki dəfə evlənən Robert Redford ekran işlərində bir çox baş rol partnyoru ilə sevgi macəraları yaşamışdı. Bəzi hallarda bu ssenari sevgiləri aktrisaların real həyatına da keçmişdi, amma Redford üçün onlar yalnız film sərhədlərində qalırdı.

Vəfalı Həyat Yoldaşı

Hollivudun yaraşıqlısı hesab edilən Redford ilk evliliyini 1958-ci ildə tarixçi Lola Van Vaqenenlə qurmuşdu. Redfordun 21, Vaqenenin isə 19 yaşı vardı. Cütlüyün xoşbəxtliyi ilk övladları Skotun doğulduqdan 10 həftə sonra vəfat etməsi ilə kölgələndi. Evlad acısı yaşayan Robert Redford həmin dövrü belə xatırlayırdı: "Çox gənc idik. İlk teatr işimi görürdüm və az qazanırdım. Ani körpə ölümü sindromu haqqında heç nə bilmirdik, bu, sağalmayan bir yaradır." Daha sonra üç övladı daha olan cütlük 1985-ci ildə boşandı. Redford 2009-cu ildə sevgini yenidən taparaq alman rəssam Sibille Zaqqars ilə ikinci dəfə evləndi. Ekologiya ilə bağlı sənət əsərləri yaradan Zaqqars, özündən 20 yaş böyük Redfordun da ekoloq olmasına töhfə verdi. On altı illik bu evlilik Redfordun ölümü ilə sona çatdı.

Kino Sevgiləri, Şəxsi Həyatı Və Sirrləri

Robert Redford və Barbra Streisand 1973-cü ildə kassada rekord qıran "Biz Necə İdik" ("The Way We Were") adlı filmdə romantik personajları canlandırmışdılar. Onlar arasında ekranda sıx bir kimya hiss olunurdu. Maraqlısı odur ki, Redford filmin çəkilişləri zamanı "özünü qorumaq" üçün ikiqat alt paltarı geyinmişdi. Filmə mövzu olan kitabın müəllifi Robert Hofler, Streisandın hələ üz-üzə tanış olmadan aktyora aşiq olduğunu söyləmişdi. Streisand sonralar etiraf etmişdi: "Robert, səninlə filmdə belə olsa, evli olmaq çox gözəl idi."

Ceyn Fondanın Platonik Məhəbbəti

Hollivudun superulduzları Robert Redford və Ceyn Fonda dörd filmdə birlikdə rol almışdılar. Fonda hər bir filmdə Redforda qarşı əsl hisslər bəslədiyini və ona aşiq olduğunu etiraf etmişdi. Redforda duyduğu platonik məhəbbət dostluğa çevrilən Fonda, aktyorun ölümü ilə bağlı yaydığı mesajda belə demişdi: "Bu səhər Robertin vəfat etdiyini öyrənincə çox təsirləndim. Ağlamağımı dayandıra bilmirəm. O, mənim üçün çox şey ifadə edirdi və hər cəhətdən gözəl bir insan idi."

24 saat