Netanyahu oğlunun adı niyə dəyişib?
Yerli mediada yayılan xəbərlərə görə, İsrailin Baş naziri Benyamin Netanyahu oğlu Avner Netanyahu adını Avi Segal olaraq dəyişdirib. O, bu adla İngiltərədə universitetə qeydiyyatdan keçib və bir mənzil satın alıb. Netanyahu müxalifətdə olarkən, 2022-ci ildə təhsil üçün İngiltərəyə gedən Avnerin müsəlman əhalinin sıx yaşadığı bölgədə "Netanyahu" soyadı ilə tanınmaq qorxusu ilə adını dəyişərək bu yeni kimliyi istifadə etməyə başladığı məlum olub.
Təhsilini gizli davam etdirən Avner, İsrail şəxsiyyət vəsiqəsində adını nənəsinin soyadından istifadə edərək Avi Segal olaraq dəyişdiyini, həmçinin sürücülük vəsiqəsi və pasportunda da bu dəyişikliyi etdiyini bildirib. O, müsəlmanların yaşadığı bir ölkədə əvvəlki adı ilə gəzməkdən qorxduğunu qeyd edib.
Mənzil alışı və vergi məsələləri
Məlumata görə, Avner Avi Segal adı ilə İngiltərədə 502 min sterlinqə mənzil alıb. Bu alış-verişi nağd şəkildə həyata keçirdiyi ortaya çıxan Avner, daha sonra Oksford Universitetində magistr təhsilinə atası ilə əlaqəsini gizlədərək başlayıb. Məktəbdəki qeydiyyatda da onun adının bu yeni kimliklə qeyd edildiyi bildirilir.
İsrail qanunlarına əsasən, xaricdən alınan və dəyəri 2 milyon İsrail şekelindən aşağı olan əmlaklar üçün vergi idarəsinə bəyan etməyə ehtiyac yoxdur. Xəbərdə vurğulanır ki, sterlinqin şekelə qarşı ən zəif olduğu dövrdə Avnerin aldığı mənzilin qiyməti 1,97 milyon şekelə bərabər olduğu üçün bəyanat verilməyib. Mənzili əldə etdiyi mənbə barədə soruşulduqda, Avner bunun ailəsindən olduğunu bildirib. Avner Netanyahunun 7 oktyabr 2023-cü ildən sonra İngiltərədən İsrailə qayıtdığı qeyd olunub. İsrail mətbuatı Netanyahu ailəsinin çoxsaylı mülklərinin olduğunu bildirərək, Avnerin İngiltərədən aldığı mənzilin də bunlardan biri olduğunu yazıb.
Yair Netanyahu diplomatik pasport qalmaqalında
Digər tərəfdən, İsrail Baş naziri Netanyahunun digər oğlu Yairin haqqı olmayan şəxslərə diplomatik pasport verilməsi ilə bağlı davam edən istintaq çərçivəsində İsrail polisinin korrupsiya cinayətləri ilə mübarizə şöbəsi "Lahav 433" tərəfindən ifadəyə çağırıldığı bildirilib.
Yairin haqqı olmadığı halda diplomatik pasport aldığına dair şübhələr var. İsrail daxili kəşfiyyat təşkilatı Şin-Betin (Şabak) bunun vacib olmadığına inandığı qeyd edilib.