Okan Buruk Mourinhoya münasibətdə şişirdiyini dedi

"Qalatasaray"ın baş məşqçisi Okan Buruk, "Liverpul" matçı öncəsi "The Athletic"ə Joze Mourinyo haqqında danışıb.

Ötən mövsüm Mourinyo ilə aralarında yaşanan rəqabətə dair suallara cavab verən təcrübəli baş məşqçi, portuqaliyalı çalışdırıcıya qarşı böyük mübarizə apardığını bildirib. Mourinyoya qarşı mübarizənin çətinliyini qeyd edən Buruk, "Keçən il Türkiyədə Mourinyoya qarşı mənim üçün böyük bir mübarizə idi. Adətən "Qalatasaray", "Fənərbaxça"ya qarşı oynayır və ya "Qalatasaray", "Mançester Siti"yə qarşı oynayır. Amma bir baş məşqçi olaraq, xüsusi bir şey yaratsam, Pepə qarşı bir şeylər əldə etdiyimi deyə bilərəm" deyib.

Aralarında yaşanan gərginliyə də toxunan Okan Buruk, "Özümü oyunçu kimi hiss edirdim, yerə yıxıldım. Bir az şişirtdim. (Burun sıxma hadisəsi). Ondan belə bir şey gözləmirdim. Hakimlərlə əl sıxışırdım, digər tərəfə keçib qələbəmizi qeyd edirdim, o da yanıma gəldi. Normalda matçdan sonra əl sıxışmaq üçün görüşərdik" ifadələrini işlədib.

Joze Mourinyonun meydandan kənarda da mübarizə aparmaq xüsusiyyəti olduğunu ifadə edən Buruk, "Mourinyo ilə qarşılaşmaq çox çətin idi. "Fənərbaxça"ya imza atanda çox danışmağa başladı. Tərzi məlumdur. Yalnız meydanda oynamır. Meydandan kənarda da oynamaq istəyir. Çox şey sınadı, amma sonda biz ondan daha yaxşı idik. Mən ondan daha yaxşı idim. Ona qarşı çempionluq qazandıq. Onları öz meydanlarında iki dəfə məğlub etdik. Bu il təəssüf ki, burada olmayacaq. Onunla iki matç daha oynamağı gözləyirdik" deyib.

Okan Buruk, Mourinyonun özünü inkişaf etdirmədiyini də bildirərək bu sözləri deyib: "Əvvəlki kimi diqqətini cəmləyə bilmir. Futbola əvvəlki kimi baxmır. Baş məşqçi olaraq tərzini heç dəyişmədi. Həqiqətən vacib bir xarakterdir, həqiqətən vacib bir cazibəsi var, amma futbol baxımından hər il özümüzü inkişaf etdirməliyik. Bəlkə də onun üçün problem, baş məşqçi olaraq özünü inkişaf etdirməməsi oldu".

24 saat