Qalatasarayın keçmiş ulduzu həbs olundu

Braziliyalı Jo Nafaqə Borcuna Görə Həbs Olundu

Braziliyalı futbolçu Jo, ödənilməmiş aliment borcları səbəbindən Rio-de-Janeyroda polis tərəfindən saxlanılıb. Bir zamanlar "Qalatasaray" və "Mançester Siti" kimi məşhur klublarda forma geyinmiş hücumçu, uşaqlarına olan maddi öhdəliklərini yerinə yetirməməsi ucbatından həbs olunub.

Borcun Məbləği Açıqlanıb

İngiltərənin "Mirror" nəşrinin yaydığı məlumata görə, 38 yaşlı Jonun uşaq alimenti üzrə təxminən 31.500 funt sterlinq məbləğində borcu var. Polis əməkdaşları onu Rio-de-Janeyronun Barra da Tijuca bölgəsindəki küçə yeməkləri tədbirində tapıblar. Səkkiz övladı olan Jonun həbsi üçün verilən qərar, 2024-cü ildə ödənilməmiş aliment davası ilə əlaqədardır.

İlk Həbs Deyil

Məhkəmənin qərarında borcun 220.744,57 Braziliya realı (təxminən 1.3 milyon TL) olduğu qeyd edilib. Polis Jonu həbs etdikdən sonra Barra da Tijucadakı 16-cı polis bölməsinə aparıb. Braziliya milli komandasının sabiq üzvü, eyni səbəbdən ötən il Kampinasda iki dəfə və Kontagemdə bir dəfə saxlanılmışdı.

Aliment ödəməmək Braziliyada ciddi qanun pozuntusu sayılır və bu cür hallarda borclular barəsində həbs qərarı çıxarıla bilər.

Komanda Avtobusundan Endirilmişdi

2024-cü ilin may ayında Jo, "Amazonas" komandasının heyətində Ponte Preta ilə səfər matçına gedərkən polis tərəfindən komanda avtobusundan endirilməsi ilə gündəmə gəlmişdi. Həmin vaxt da o, eyni səbəbdən – aliment ödəməməkdən dolayı həbs olunmuşdu.

Karyera Yolunda "Qalatasaray" İzi

Jo, 2008-ci ildə "CSKA Moskva"dan "Mançester Siti"yə 19 milyon funt sterlinqə transfer olaraq, o dövr üçün rekord məbləğə keçmişdi. Lakin İngiltərədə gözləntiləri doğrultmayan braziliyalı futbolçu, "Everton"da iki dəfə icarə əsasında oynadıqdan sonra Türkiyəyə gəlmişdi. "Qalatasaray"da icarə müqaviləsi ilə forma geyinən Jo, daha sonra vətəninə qayıdıb. Karyerasının sonlarında "Itabirito"nun şərəfini qoruyan Jo, bu ilin əvvəlində futbolçu karyerasına son qoyub.

24 saat