Yeni mövsümə hazırlıq çərçivəsində transfer fəaliyyətlərini davam etdirən Trabzonsporun ilk transferi olan Vaqner Pina bu gecə Trabzona çatıb. "Bordo-mavililər" "Estoril"dən cəlb etdikləri 22 yaşlı sağ müdafiəçi ilə 4 illik müqavilə imzalayıblar.
"TRABZONSPOR"U TANIYIRDIM"
Hava limanında jurnalistlərin suallarını cavablandıran Vaqner Pina bildirib ki, hər şey sürətlə inkişaf edib. O, komandaya gəlmək istəyirmiş və son təklifi gözləyirmiş. Təklif edildikdən sonra hadisələr cəld baş verib. O, burada oynayan tanış oyunçuların olduğunu qeyd edib: "Bosinqva və Pereira var. Milli komandada birlikdə oynadığım Djaniny də var. Onlardan çox məlumat əldə etmişdim. Buna görə də gəlməmişdən əvvəl Trabzonsporu tanıyırdım."
"BURADA HƏDƏFLƏRİM VAR"
"Süper Liqanın çox yaxşı bir liqa olduğunu bilirəm. Avropanın ən yaxşı oyunçuları buranı seçməyə başlayıb. Bura çətin və yaxşı bir liqadır. Hələlik məşqçimizlə görüşməmişəm, onunla danışacağıq. Burada hədəflərim var. Bacardığım qədər burada qalıb komandaya xidmət etmək istəyirəm."
"Pedro ilə Portuqaliya Liqasında birlikdə oynadığımızdan onu tanıyırdım. Yaxşı oyunçu olduğunu bilirdim. O, bunu burada da hamıya göstərdi. Mən də onun bu uğurlarını təkrarlamaq üçün buradayam," əlavə edib.