Asensionun etirafı məni heyrətləndirdi

Fenerbahçe Ulduzu Marco Asensiodan İstanbul və Futbol Haqqında Səmimi Etiraflar

Türkiyənin nəhəng derbisi ərəfəsində Fenerbahçenin ulduz futbolçusu Marco Asensio İspaniyanın "Marca" qəzetinə səmimi müsahibə verib. O, klubuna transfer olduğu gündən bəri göstərdiyi performansla azarkeşlərin sevimlisinə çevrildiyini, İstanbul və kluba sürətlə adaptasiya olduğunu bildirib. İstanbulun dinamik həyat tərzi və futbola olan böyük maraqdan bəhs edən ispaniyalı futbolçu qeyd edib: "İstanbul çox sıx, əhalisi çox olan bir şəhərdir. Lakin ən heyrətamiz şey futbol ehtirasıdır. İnsanlar futbolu sonuna qədər yaşayır; bunu istər ev oyunlarında, istərsə də səfər matçlarında hiss etmək olur. Çölə çıxanda adətən üzümü bağlayıram, amma yenə də məni tanıyanlar olur. Problem deyil, insanlar hörmətcil, nəzakətli və hər zaman ruhlandırıcıdır."

İstanbuldakı Həyat və Gündəlik Rutin

İspaniyalı ulduz İstanbuldakı gündəlik rejimini də açıqlayıb: "Sakit şəkildə erkən qalxıram. Təxminən 30-40 dəqiqəlik piyada gəzinti ilə məşqə gedirəm. Səhər yeməyi yedikdən sonra məşqə hazırlaşır və çalışırıq. Məşqdən sonra əlavə məşqlərimi yerinə yetirirəm. Günün ikinci yarısını isə evdə işləyərək tamamlayıram."

"Süper Liqin Səviyyəsi Məni Çox Təəccübləndirdi"

Türkiyədəki futbol səviyyəsinin gözlədiyindən xeyli yüksək olduğunu vurğulayan Marco Asensio deyib: "Bu liqanın çətin olduğunu eşitmişdim, lakin səviyyəsi məni həqiqətən təəccübləndirdi. Burada çox yaxşı oyunçular var. Yeni baş məşqçi, yeni oyunçularla başlayan dövrlər hər zaman çətin olur. Amma tədricən yolumuzu tapır və yüksək səviyyədə çıxış edirik."

"Fenerbahçe Mənim Karyeram Üçün Mühüm Sınaq İdi"

"Fenerbahçeni seçmə səbəbi nə idi?" sualına ulduz futbolçu qəti cavab verib: "Bu, karyeram üçün mühüm bir sınaq idi. Yayda danışanda klubun iddialı bir layihəyə sahib olduğunu gördüm. Uzun illərdir çempionluq qazanılmamışdı və bunu dəyişmək istəyirdilər. Azarkeşlərin və klubun mənə göstərdiyi sevgi qərarımda təsirli oldu. Ən əsası, yenidən qələbələr qazanmaq mənim üçün şəxsi hədəfdir. Qalibiyyət mentalitetimi bura da gətirmək istəyirəm." O, transfer prosesinin uzun sürdüyünü, lakin doğru qərar verdiyinə inandığını bildirib: "Madriddən ayrıldığımdan bəri özümə meydan oxumaq məni motivasiya edir. Bəzi şərtlərə görə transfer uzandı, amma doğru qərar verdiyimə inanıram. Fenerbahçe qələbə təzyiqi baxımından Real Madridə çox bənzəyir."

İspaniya Millisi Hədəfi Hələ də Aktualdır

Marco Asensio İspaniya milli komandasına qayıtmaq arzusunu qoruduğunu ifadə edib. O, hədəflərini bu sözlərlə dilə gətirib: "Əlbəttə ki, yenidən çağırılmağı ümid edirəm. Bu mənim üçün çox önəmlidir. Luis Enrike ümid edirəm ki, baş verənləri izləyir. Üçüncü Dünya Kubokunda oynamaq inanılmaz olardı. Bu mövsüm mənim üçün əsas hədəf budur."

"Matador" Ləqəbi Məni Qürurlandırır

Türkiyədə özünə verilən "Matador" ləqəbindən qürur duyduğunu deyən futbolçu, bunun komanda daxilində də əyləncəli atmosfer yaratdığını bildirib: "Gələr-gəlməz mənə Matador ləqəbini verdilər. Bu, sosial mediada başladı, sonra komanda yoldaşlarım da belə çağırmağa başladılar. Oyun tərzimə və zərbələrimə uyğun gəldiyi üçün xoşuma gəlir. Azarkeşlərin yaratdığı atmosfer inanılmazdır; meydanda bizə çox kömək edirlər."

Luis Enrike Sualına Aydın Cavab

PSJdə Luis Enrike ilə yaşadığı iddia edilən problemlərə də toxunan Marco Asensio, məsələni şişirtmək istəmədiyini vurğulayıb: "Düzünü desəm, bildiyim qədəriylə aramızda heç bir problem olmayıb. Bəlkə bu suala o daha yaxşı cavab verə bilər. Onu çox yaxşı tanıyıram, Dünya Kubokunda və PSJdə birlikdə olmuşuq. Bunu şəxsi qəbul etmirəm; peşəkar futbol dünyasında belə hallar ola bilər. Ona qarşı heç bir kin bəsləmirəm."

24 saat