Bursada ağır yol-nəqliyyat hadisəsi: 3 nəfər dünyasını dəyişib

Bursada dəhşətli yol qəzası: 3 nəfər həlak olub

Türkiyənin Bursa şəhərində ağır yol-nəqliyyat hadisəsi baş verib. Yüksək sürətlə hərəkət edən minik avtomobili idarəetmədən çıxaraq körpü altındakı beton divara çırpılıb.

Şahidlərin bildirdiyinə görə, zərbə o qədər güclü olub ki, nəqliyyat vasitəsi tamamilə yararsız hala düşüb. Qəza nəticəsində 3 nəfər hadisə yerindəcə həyatını itirib.

Avtomobildə olan digər 2 nəfər isə ağır bədən xəsarətləri alıb. Əraziyə dərhal çoxsaylı təcili tibbi yardım və xilasetmə qrupları cəlb olunub.

Yaralılar ilkin tibbi yardımdan sonra təcili şəkildə yaxınlıqdakı xəstəxanalara yerləşdiriliblər. Onların vəziyyətinin ağır olduğu qeyd edilir.

Hüquq-mühafizə orqanları hadisə ilə bağlı araşdırmalara başlayıb. Qəzanın dəqiq səbəbləri və təfərrüatları aparılacaq ekspertiza və istintaq tədbirlərindən sonra məlum olacaq.