Əmrullayev və Əliyev MÜTDA rəhbərini buraxmadı: Eşqi Bağırovla vidalaşılır

MÜTDA rəhbəri Eşqi Bağırovun vəzifəsindən uzaqlaşdırılması iddiaları gündəmdədir

Məktəbəqədər və Ümumi Təhsil üzrə Dövlət Agentliyinin (MÜTDA) rəhbəri Eşqi Bağırovun vəzifədən gedəcəyi ilə bağlı iddialar cəmiyyətdə geniş müzakirə olunur. Məlumata görə, Eşqi Bağırov artıq bir müddətdir ki, işə çıxmır. Azərbaycanda məktəb və bağçalara nəzarət edən əsas agentliyin rəhbərinin hansı səbəbdən vəzifə başında olmaması və işindən uzaqlaşdırılması ictimaiyyətdə maraq doğurur.

Emin Əmrullayev və Elnur Əliyev tərəfindən inzibati binaya buraxılmadığı iddia edilir

Təhsil üzrə ekspert Elşən Qafarovun verdiyi məlumata görə, MÜTDA rəhbəri E. Bağırovun Emin Əmrullayev və Elnur Əliyevin göstərişi əsasında inzibati binaya buraxılmadığı bildirilir. Halbuki, E. Bağırovun bu həftə artıq vəzifə başında olması gözlənilirdi. Qafarov qeyd edir ki, Elm və Təhsil Nazirliyində illərdir bir neçə qruplaşma funksional vəzifələri ələ keçirmək uğrunda mübarizə aparır ki, bu da təhsil ictimaiyyətinə aşkar şəkildə görünür. Əsas qruplaşmalardan birinin Emin Əmrullayevin biznes tərəfdaşı Təhsil İnstitutunun direktoru Elnur Əliyevlə əlaqəli olduğu vurğulanır.

Təhsil sistemindəki daxili mübarizə və şübhəli kadr təyinatları

Elnur Əliyevin ilk addımının Təhsildə Keyfiyyət Təminatı Agentliyini nəzarətə götürmək olduğunu bildirən ekspert, bu agentlik vasitəsilə məktəb inspeksiyaları və digər layihələrin həyata keçirildiyini, bunun isə külli miqdarda vəsaitin silinməsi üçün zəmin yarada biləcəyini iddia edir. Daha sonra Məktəbəqədər və Ümumi Təhsil üzrə Dövlət Agentliyinə müavinlər və şöbə müdirləri vəzifələrinə öz adamlarını yerləşdirdiyi qeyd olunur. Nazirlikdə təhsil sahəsindəki funksional vəzifələrə son zamanlar "AzQranata" Şərabçılıq Zavodundan kadrların gətirilməsi xüsusi diqqət çəkir. Təhsilin İnkişafı Fonduna bu zavoddan kadr təyinatı edildiyi, tezliklə Peşə Təhsili İdarəsinə də eyni mənbədən kadr gətiriləcəyi ehtimal olunur.

Yaranan problemlər və Eşqi Bağırovun taleyi

Qafarovun sözlərinə görə, ölkə üzrə məktəblərin tarififikasiyaları hələ də təsdiq olunmayıb, yüzlərlə məktəbdə müəllim vakansiyaları mövcuddur. Nəticədə dərslər keçirilmir, cədvəllər hazır deyil, bölgü tamamlanmayıb. Xüsusilə Lerik və Yardımlı kimi dağlıq ərazilərdə bağlanmış məktəblərin şagirdlərinin tədrisə cəlb olunması problemi davam edir. Tədris ilinin beşinci həftəsi olmasına baxmayaraq, bu ərazilərdə dərslərin guya onlayn keçirilməsi əcaib vəziyyət yaradıb. Bu gərgin dövrdə Eşqi Bağırovun 10 gündür "məzuniyyət" adı ilə işə buraxılmadığı iddia edilir. Vaxtilə Təhsil nazirinin müavini Məhəbbət Vəliyevə qarşı da eyni metodun tətbiq edildiyi, onun nazirliyə buraxılmadığı xatırladılır. Ekspertin fikrincə, Eşqi Bağırov defakto olaraq işdən azad olunmuş sayılır və yaxın günlərdə onun rəsmi şəkildə işdən azad ediləcəyi gözlənilir. Növbəti kadrın yenidən "AzQranata" Şərabçılıq Zavodundan təyin olunacağı ehtimal edilir. Bu vəziyyət təhsil sahəsində dövlətin siyasətinin arxa plana keçərək, funksional vəzifələr uğrunda gedən müharibənin yeni qurbanı kimi qiymətləndirilir.

24 saat