Hafiz Babalıdan Audiovizual Şuraya və MEDİA-ya Müraciət: Böhtan Kampaniyası Araşdırılsın
Abzas Media işi çərçivəsində həbsdə olan araşdırmaçı jurnalist Hafiz Babalı Audiovizual Şuraya və Medianın İnkişafı Agentliyinə (MEDİA) müraciət ünvanlayıb. O, müraciətində bəzi media orqanları tərəfindən onun barəsində yayımlanan birtərəfli və böhtan xarakterli məlumatlardan şikayətlənərək, dövlət qurumlarını məsələni araşdırmağa səsləyib.Jurnalistə Qarşı “Qara PR” Kampaniyası
Hafiz Babalı müraciətində bildirib ki, hüquq-mühafizə orqanlarının tənqidi jurnalistikaya qarşı həbslər fonunda yerli mətbuatda ona qarşı genişmiqyaslı “qara PR” kampaniyası aparılır. Bu kampaniya qərəzli, birtərəfli və böhtan xarakterli materiallar vasitəsilə onun işgüzar nüfuzuna xələl gətirmək və ictimaiyyətin gözündən salmaq məqsədi daşıyır. Jurnalist qeyd edib ki, o, bu kampaniyaya qarşı məhkəmə müstəvisində mübarizə aparsa da, məhkəmələrin böhtan yayanların tərəfində çıxış etdiyini bildirib.İlk Böhtan Yazısı və Tirajlanması
O, Abzas Media işi çərçivəsində 2023-cü ilin dekabrında həbsindən sonra “qafqazinfo.az” saytında “Hafiz Babalı işində yeni detallar” başlıqlı, heç bir sübuta söykənməyən, dezinformasiya xarakterli məqalənin dərc edildiyini vurğulayıb. Həmin gün bu məqalə "İki Sahil" qəzetinin saytında, "modern.az", "demokrat.az", "pravda.az", "yenigundem.az" kimi media orqanlarında, həmçinin "ATV" telekanalının "Xəbərlər" proqramında ilkin mənbəyə istinadla yayımlanmışdır. Jurnalistin sözlərinə görə, həmin məqalə informasiya agentliyi olmayan bir mənbəyə istinad edərək, onun obyektiv imicini ləkələmək məqsədi güdüb. O, bu yazıların müəlliflərinin həbsdə olmasından istifadə edərək, əməllərinin cavabsız qalacağını düşündüklərini bildirib. Bu yazılardan xəbərdar olan Hafiz Babalı vəkili vasitəsilə təkzib tələb edərək, sonradan məhkəməyə müraciət etmək məcburiyyətində qalıb."Baku TV" Materialı və Məhkəmə Prosesləri
Jurnalist daha sonra 2024-cü il mayın 2-də "Baku TV" telekanalında "Anonim bank kartları, məxfiləşdirilmiş elektron kanallar, mənzil-ofislər | Niyə?" başlıqlı videomaterialın yayımlandığını qeyd edib. Cəmi üç gün sonra bu material mətn formatında "Report" İnformasiya Agentliyi və "qafqazinfo.az" xəbər saytı tərəfindən yayılıb. O, bildirib ki, bu qarayaxma materialda da onun şəxsini hədəf alan böhtan xarakterli məlumatlar yer alıb. Əvvəlki hallarda olduğu kimi, bu dəfə də obyektivlik və qərəzsizlik prinsiplərinə riayət edilməyib, habelə onun mövqeyi vəkili vasitəsilə öyrənilməyib. Hafiz Babalı həbsdə olması və maddi çətinliklər səbəbindən bütün böhtan yayan media orqanlarını deyil, yalnız "Baku TV" telekanalını təkzib verməyə, üzr istəməyə və dəymiş mənəvi zərərin ödənilməsinə dair tələblə məhkəməyə verdiyini diqqətə çatdırıb. Hafiz Babalının "qafqazinfo.az" saytına qarşı apellyasiya şikayətinə oktyabrın 21-i saat 10:00-da, "Baku TV" telekanalına qarşı mülki iddiasına isə sentyabrın 4-ü saat 16:40-da Nəsimi Rayon Məhkəməsində baxılacağı bildirilir. Jurnalist bu açıq məhkəmə proseslərində müraciət ünvanladığı dövlət nəzarət orqanlarının nümayəndələrinin də iştirak etməsini arzuladığını vurğulayıb.Qanun Tələbləri və Agentliyin Fəaliyyəti
"Media haqqında" qanuna görə, mediada şərəf və ləyaqətin alçaldılmasına, işgüzar nüfuzun ləkələnməsinə, böhtana və birtərəfliyə yol verilməməlidir. Faktlar və hadisələr qərəzsiz, obyektiv şəkildə təqdim olunmalı, qanuni qüvvəyə minmiş məhkəmə qərarı olmadan şəxsin təqsirli olması barədə məlumat dərc edilməməlidir.Jurnalistika etikası da bunu tələb edir.
Lakin o, yerli media orqanlarının bu cür natəmiz məlumatlarla çirkləndirildiyini və dövlət qurumlarının bu hallara biganə qaldığını bildirib. Hafiz Babalı qeyd edib ki, Media Agentliyi dezinformasiya və saxta xəbərlərlə mübarizə üçün yüksək məbləğli seminarlar və konfranslar təşkil etsə də, bir çox yerli KİV-lər bu mübarizəni ya sabotaj edir, ya da hansısa səbəbdən toxunulmaz qalırlar.
Oxucu Şərhləri
Hələlik heç bir şərh yazılmayıb. İlk şərhi siz yazın!
Şərh Yaz