Meksikada təhlükəli epidemiya: "Ətyeyən" milçəklər insanları öldürür

Meksikada təhlükəli epidemiya: 'Ət yeyən' milçəklər can alır

Meksikada uzun illərdən sonra yenidən üzə çıxan və xalq arasında "ət yeyən vidalı qurd milçəyi" kimi tanınan parazit növü ölkədə ciddi təşviş yaradıb. Səhiyyə rəsmiləri bu milçək növünün insan sağlamlığı üçün getdikcə daha böyük təhlükəyə çevrildiyini bəyan ediblər.

Son bir il ərzində aparılan müşahidələr nəticəsində 200-dən çox yoluxma halı rəsmən qeydə alınıb. Mütəxəssislər vurğulayırlar ki, bu qurdlar insan toxumalarına nüfuz edərək ağır infeksiyalara və ciddi fəsadlara səbəb olur.

Təəssüf doğuran hal odur ki, epidemiyanın yayılma sürəti və vurduğu zərər artıq ölümcül nəticələrə gətirib çıxarıb. Tədqiqatçıların məlumatına görə, indiyədək bu parazit səbəbindən 6 nəfər dünyasını dəyişib.

Səhiyyə qurumları vətəndaşları gigiyena qaydalarına ciddi şəkildə riayət etməyə və dəridə hər hansı şübhəli zədələnmə müşahidə etdikdə dərhal tibbi yardıma müraciət etməyə çağırıb. Xəstəliyin qarşısının alınması məqsədilə müvafiq dövlət orqanları tərəfindən genişmiqyaslı dezinfeksiya tədbirləri və maarifləndirmə işləri həyata keçirilir.