Pakistanda leysan yağışları və daşqınlar 21 can aldı

Pakistanı cənginə alan təbii fəlakət

Musson yağışları ilə əlaqəli hadisələrdə Pakistanda ən azı 21 nəfərin həyatını itirdiyi bildirilib. Bu son ölümlər ölkə üzrə keçən həftədən bəri daşqınlar və sürüşmələr nəticəsində həyatını itirənlərin ümumi sayını 400-dən yuxarıya qaldırıb. Milli Fəlakət İdarəetmə Təşkilatının (NDMA) çərşənbə günü yaydığı məlumata görə, şimaldakı Gilgit-Baltistanda 11 nəfər, Pakistanın maliyyə mərkəzi olan Karaçidə isə 10 nəfər həlak olub. Karaçidə baş verən güclü musson yağışları elektrik cərəyanından ölümlərə və evlərin uçmasına səbəb olub.

Karaçidə vəziyyət kritikdir

20 milyondan çox insanın yaşadığı Karaçidə məktəblər bağlı qalıb, proqnozçular şənbə gününə qədər daha güclü musson yağışları barədə xəbərdarlıq ediblər. Sindh əyalətinin baş meteoroloqu Əmir Hayder Lağari, şəhər ərazilərindəki ciddi daşqınları "zəif infrastruktur" ilə əlaqələndirib. Şəhərin köhnəlmiş boru və drenaj sistemləri güclü yağış axını ilə mübarizə apara bilməyib, nəticədə bütün məhəllələr su altında qalıb. Sakinlər evlərindən lilli suyu çömçələrlə boşaldırdılar, elektrik və telefon kəsintiləri isə vəziyyəti daha da ağırlaşdırırdı. Vilayət rəsmiləri iki rayonda 40-50 evin zədələndiyini bildiriblər. NDMA-nın sədri İnəm Hayder Malik qeyd edib ki, "ay sonu başqa bir yağış dövrü başlayacaq."

Şimal vilayətlərində ağır itkilər

Şimaldakı Hayber Paxtunxva əyaləti ən çox zərər çəkmiş bölgə olub; keçən cümə axşamından bəri 350-dən çox insan həlak olub. Səlahiyyətlilər və ordu birləşmələri daşqın və sürüşmələr nəticəsində itkin düşmüş onlarla kənd sakinini axtarır. Çayları və drenaj sistemlərini tıxayan qalıqları təmizləmək üçün ekskavatorlar səfərbər edilib. Ordu polkovniki İrfan Əfridi Buner rayonunda AFP agentliyinə açıqlamasında bildirib: "Biz yardım düşərgələri qurmuşuq və orada tibbi yardım göstəririk. Həmçinin bütün insanlara quru ərzaq və çadırlar veririk." Son günlərdə bu rayonda 220-dən çox insan həlak olub. Yardım düşərgəsində tibbi işçi olan Ancum Ənvər deyib: "Uşaqlar qorxurlar. Qorxudan gecə yata bilmədiklərini deyirlər. Daşqın... bütün yaşayış məntəqələrimizi məhv edib."

İqlim dəyişikliyinin ağır nəticələri

İyun ayından sentyabr ayına qədər davam edən musson mövsümü Pakistanın dağlıq şimalına və daşqınlara meyilli cənubuna tez-tez dağıntılar gətirir. Səlahiyyətlilər hazırkı yağışların sentyabrın ortalarına qədər davam edə biləcəyi barədə xəbərdarlıq edirlər. Rəsmilərin bildirdiyinə görə, bu ilki musson dövrü başlayandan bəri 750-yə yaxın insan həlak olub. İqlim dəyişikliyinə ən həssas ölkələrdən biri olan Pakistan son illərdə getdikcə daha ekstremal hava hadisələri ilə üzləşir. 2022-ci ildə baş verən musson daşqınları ölkənin üçdə birini su altında qoymuş və təxminən 1700 insanın ölümünə səbəb olmuşdu.

24 saat