Prokuror Azər Qasımlı üçün 13 il həbs istədi

Prokuror Azər Qasımlı üçün 13 il həbs cəzası istədi

Siyasi Menecment İnstitutunun həbsdə olan rəhbəri Azər Qasımlı barəsindəki cinayət işi üzrə məhkəmə istintaqı başa çatıb. Dövlət ittihamçısı çıxış edərək, Qasımlının hədə-qorxu ilə tələb etmə əməlinin sübuta yetirildiyini iddia edib və onun 13 il müddətinə azadlıqdan məhrum edilməsini istəyib.

Zərərçəkmiş şəxs qismində tanınan Qurbanəli Yusifov da prokurorun tələbi ilə razılaşdığını bildirib. Müdafiə tərəfi isə çıxış üçün məhkəmədən vaxt istəyib.

Məhkəməyə gətirilməyən əsas şahid

Fevralın 11-də Bakı Ağır Cinayətlər Məhkəməsində hakim Telman Hüseynovun sədrliyi ilə keçirilən iclasda maraqlı bir hadisə yaşanıb. Belə ki, Azər Qasımlını ittiham edən Qurbanəli Yusifovun keçmiş həyat yoldaşı Fərəhbanu Yusifovanın məhkəməyə məcburi gətirilməsi barədə qərar olsa da, polis onu tapa bilmədiyini bəyan edib. Nəticədə, Fərəhbanu Yusifovanın adı şahidlər siyahısından çıxarılıb.

Azər Qasımlı bu qərara sərt etirazını bildirib: “Azərbaycan polisi istədiyi şəxsi tapıb gətirə bilir. Bu məntiqlə istənilən şahid məhkəməyə gəlməkdən yayına bilər?”

İttihamı şübhə altına alan boşanma detalları

Müdafiə tərəfinin vəsatəti ilə Qurbanəli Yusifovun boşanma tarixçəsi araşdırılıb. Məlum olub ki, o, həyat yoldaşından 2022-ci ilin yanvarında öz təşəbbüsü ilə boşanıb. Vəkillər bu faktın ittihamla ziddiyyət təşkil etdiyini vurğulayıblar. Belə ki, Yusifov istintaqa ifadəsində Azər Qasımlının 2022-2023-cü illərdəki təhdidləri ucbatından “ailəsinin dağıldığını” iddia etmişdi.

Borc mübahisəsi və kriptovalyuta iddiası

Siyasətçinin həyat yoldaşı Samirə Qasımlı isə mübahisənin əsl səbəbinin borc olduğunu bildirir. Onun sözlərinə görə, Qurbanəli Yusifov 2020-ci ilin mayında Azər Qasımlının adına kriptovalyuta hesabı açıb. Həmin ilin may-avqust aylarında Qasımlı ona iki bitcoin almaq üçün 20 min ABŞ dolları verib. Lakin sonradan Yusifovun yalnız bir bitcoin aldığı, digərini isə mənimsədiyi, daha sonra isə həmin tək bitcoinin də hesabdan yoxa çıxdığı məlum olub.

Samirə Qasımlı qeyd edib ki, 2022-ci ilin yanvarında Qurbanəli Yusifov borcu hissə-hissə qaytaracağına dair qəbz imzalayıb. Lakin qısa müddət sonra ölkəni tərk edərək əlaqəni kəsib. Bundan sonra siyasətçi məhkəməyə üz tutub və 2024-cü ilin aprelində Mingəçevir Şəhər Məhkəməsi onun xeyrinə qərar çıxarıb.

Azər Qasımlı 2024-cü ilin dekabrından bəri həbsdədir. O, Cinayət Məcəlləsinin 182.3.2-ci maddəsi (külli miqdarda əmlak əldə etmək məqsədilə hədə-qorxu ilə tələb etmə) ilə ittiham olunur. Siyasətçi isə bütün ittihamları rədd edərək, həbsini siyasi fəaliyyəti ilə bağlayır.

Mənbəyə görə, bu xəbər vacib bir mövzudur. Oxuduğunuz üçün təşəkkür edirik!İndi rəy bildirin!

24 saat