Şəhər daxilində sola dönməyə niyə qadağa qoyulur? Səbəblər açıqlandı

Şəhərlərdə sola dönüşlər niyə qadağan edilir? Səbəb bəlli oldu

Dünyanın bir çox meqapolisində yol-nəqliyyat hadisələrinin qarşısını almaq üçün qeyri-adi və radikal qərarlar qəbul edilir. Aparılan son tədqiqatlar göstərir ki, yol kəsişmələrində baş verən qəzaların 60 faizdən çoxu məhz sola dönmə manevri zamanı qeydə alınır. Məhz bu səbəbdən bir sıra şəhər rəhbərlikləri sürücülərin sola dönməsinə ciddi məhdudiyyətlər tətbiq etməyə başlayıb.

ABŞ-ın San-Fransisko və Solt-Leyk-Siti kimi şəhərləri bu təcrübəni sınaqdan keçirən ilk yaşayış məntəqələrindəndir. Mütəxəssislərin fikrincə, sola dönüşlər həm qarşıdan gələn avtomobillərin hərəkətinə mane olur, həm də sürücülərin diqqətini yayındıraraq qəza ehtimalını ciddi şəkildə yüksəldir.

Şəhərsalma üzrə ekspertlər alternativ variant kimi sürücülərə sağa dönüşlərdən istifadə etməyi və ya dairəvi hərəkət qovşaqlarına üstünlük verməyi məsləhət görürlər. Bu üsul həm nəqliyyatın axıcılığını qoruyur, həm də sürücülərin daha təhlükəsiz şəraitdə manevr etməsinə imkan yaradır.

Sözügedən qadağaların tətbiq olunduğu ərazilərdə yol qəzalarının sayının nəzərəçarpacaq dərəcədə azaldığı müşahidə edilir. Şəhər rəsmiləri bu sistemin tətbiq dairəsinin genişləndirilməsinin gələcəkdə çoxlu sayda insanın həyatını xilas edə biləcəyini vurğulayırlar.