Sergey Furqala ikinci işindən 25 il ümumi cəza

Moskvanın Babuşkinski Məhkəməsi Rusiya Federasiyasının Xabarovsk diyarının keçmiş qubernatoru Sergey Furgalı onunla bağlı ikinci cinayət işi çərçivəsində 23 il ciddi rejimli koloniyada həbs cəzasına məhkum edib. Əvvəlki məhkəmə hökmü ilə birlikdə, Furgalın ümumi həbs müddəti 25 ilə çatıb. Bu barədə RİA Novosti agentliyi məlumat yayıb. Furgala qarşı ikinci cinayət işi 2021-ci ilin oktyabrında, onun artıq bir il yarım Moskvadakı məşhur "Lefortovo" istintaq təcridxanasında saxlanıldığı bir vaxtda qaldırılmışdı. Bu iş, əsasən, iqtisadi xarakterli cinayətlərlə bağlı ittihamları əhatə edirdi. İstintaqın versiyasına görə, Furgal 2018-2020-ci illər arasında, əvvəlcə Dövlət Dumasının nüfuzlu deputatı, daha sonra isə Xabarovsk qubernatoru kimi yüksək vəzifələri tutarkən, Uzaq Şərqdə polad istehsalı ilə məşğul olan yeganə elektro-metallurgiya müəssisəsi — "Amurstal" zavodunun ("Toreks-Xabarovsk" MMC) vəsaitlərinin mənimsənilməsində fəal iştirak edib. Müstəntiqlər bildirirlər ki, Furgal cinayətkar qruplaşmanın üzvü kimi Mənzil-Kommunal Təsərrüfatı Bankından iki milyard rubldan artıq, eləcə də Britaniyanın "Global Metcorp Ltd" şirkətindən 8,7 milyon dollar məbləğində vəsaiti qanunsuz yolla ələ keçirib.

İlk Məhkəmə Hökmü və Kütləvi Etirazlar

Sergey Furgal 2018-ci ildən etibarən Xabarovsk diyarına rəhbərlik edirdi. 2020-ci ilin iyul ayında o, gözlənilmədən saxlanılaraq Moskvaya gətirildi və 2003-2004-cü illərdə törədilmiş sahibkarların qətllərinin təşkili və qətlə cəhd ittihamları ilə həbs olundu. Furgal öz üzərinə qoyulan ittihamları heç vaxt qəbul etməyib. 2023-cü ilin fevralında ilk cinayət işi üzrə ona 22 il ciddi rejimli koloniya cəzası kəsildi. Furgalın saxlanılmasından dərhal sonra Xabarovskda bir neçə ay davam edən genişmiqyaslı kütləvi etirazlar baş qaldırdı. Aksiyanın iştirakçıları qubernatorun azadlığa buraxılmasını tələb edirdilər.

Dövlət Xeyrinə Müsadirə Edilən Milyardlar

2024-cü ilin dekabrında Xabarovskda yerli məhkəmə Baş Prokurorluğun tələbi ilə keçmiş qubernator Sergey Furgaldan 8,5 milyard rubl məbləğində vəsaitin dövlətin xeyrinə müsadirə edilməsi barədə qərar qəbul etdi. Prokurorluğun iddialarına görə, Furgal 2007-2020-ci illər ərzində, yəni Dövlət Dumasının deputatı və Xabarovsk qubernatoru olduğu dövrdə, qara metal qırıntılarının yığılması və satışı ilə məşğul olan müxtəlif şirkətlərdən qeyri-qanuni gəlirlər əldə edib. Prokurorluq vurğulayırdı ki, onun gəlir bəyannamələrində bu sahibkarlıq fəaliyyəti ilə bağlı heç bir məlumat öz əksini tapmayıb.

24 saat