Son Dəqiqə: Dəmir Günbəz dünya gündəmində – Xüsusiyyətləri və Ərdoğanın 50 illik proqnozu

Türkiyənin aparıcı müdafiə sənayesi şirkətlərindən Aselsan, texnoloji imkanlarını gücləndirmək və istehsal həcmini artırmaq məqsədilə dünən iki mühüm addım atdı. Aselsan Oğulbey Texnologiya Bazasının təməli qoyuldu və Türkiyə Silahlı Qüvvələrinə təhvil verilən "Çelik Kubbe" sisteminin əsas komponentləri ictimaiyyətə təqdim edildi.

Beynəlxalq Mətbuatın Reaksiyası: Türkiyənin Müdafiə Sənayesi Güclənir

Livanın ərəbdilli nəşri Al Akbhar, "Türkiyə ordusu "Çelik Kubbe" sistemini təhvil aldı… Ərdoğan: 'Bu tarixi bir uğurdur' dedi" başlığı ilə xəbəri oxucularına çatdırıb. Nəşr qeyd edib ki, layihənin başlanmasından bir il sonra Türkiyə Silahlı Qüvvələri Ankaranın regional münaqişələr fonunda müdafiə qabiliyyətlərini artırmaq addımı olaraq gördüyü "Çelik Kubbe" hava hücumundan müdafiə sistemini qəbul edib. Prezident Rəcəb Tayyib Ərdoğan ölkəsinin tarixi uğurunu yüksək qiymətləndirərək, bunun "dostlara güvən, düşmənlərə qorxu verdiyini" söyləyib. Ərdoğan, bu investisiyanın "bütün Avropadakı ən böyük inteqrasiya olunmuş hava hücumundan müdafiə obyekti" olacağını bildirib və yeni kompleksdəki ilk obyektin 2026-cı ilin ortalarında fəaliyyətə başlayacağını açıqlayıb. O vurğulayıb ki, bu investisiya Türkiyəni yalnız regional aktor deyil, müdafiə sənayesi sistemləri sahəsində qlobal oyunçuya çevirəcək. Yunanıstanın Politic.gr nəşri "Türkiyə hava hücumundan müdafiə sistemlərinin inkişafına 1.5 milyard dollar sərmayə qoyaraq müdafiə strategiyasını gücləndirir" ifadələrindən istifadə edib. Bu investisiyanın Türkiyənin müdafiə sektorunu gücləndirmə strategiyasının bir hissəsi olaraq Cümhuriyyət tarixinə ən böyük tək investisiya kimi daxil olduğunu qeyd edib. Məqalədə, Aselsanın "Çelik Kubbe"nin fərdi komponentlərini istehsal etmək üçün bu ilin əvvəlində 616 milyon dollarlıq dövlət təşviqi alacağı, bunun təxminən 2 min 244 yeni iş yeri yaradacağı vurğulanıb. Bu addım Ərdoğanın döyüş təyyarələrini, freqatları, pilotsuz uçuş aparatlarını və ballistik raketləri yerli istehsal etməyə yönəlmiş daha geniş strategiyasının tərkib hissəsidir. Məqsəd, ordunu gücləndirmək və Türkiyənin Yaxın Şərqdəki və ondan kənardakı təsirini artırmaqdır. Aselsan ölkənin iddialı müdafiə layihələrinin əksəriyyətində mərkəzi rol oynayır. Şirkətin səhm dəyəri bu il yüzdə 153 artaraq bazar dəyərini təxminən 20 milyard dollara çatdırıb. Yunanıstanın Newpost.gr nəşri isə "Türkiyə "Çelik Kubbe" üçün yeni hava hücumundan müdafiə sistemləri təhvil aldı, Ərdoğan 'Səviyyəmizi yüksəldirik' dedi" başlığı ilə xəbərini oxucularına çatdırıb. Nəşr qeyd edib ki, Türkiyə "Çelik Kubbe" proqramı çərçivəsində yeni hava hücumundan müdafiə sistemlərinin təhvil alınması ilə müdafiə potensialını gücləndirir. Ərdoğan Aselsanı "Türkiyə müdafiə sənayesinin ürəyi" adlandıraraq, "Bugünkü təhvilvermələr, mübarizəmizin boşa getmədiyinin ən konkret sübutudur" ifadələrini işlədib. O, sözlərini yekunlaşdırarkən, qarşıdakı 50 il üçün aşağıdakı proqnozunu paylaşıb: "Türkiyə, yalnız öz ehtiyaclarını qarşılayan deyil, həm də texnologiya sahəsində dünyaya istiqamət verən bir ölkə olacaq." ABŞ-ın aparıcı televiziya kanallarından ABC-nin internet saytı "Türkiyə Prezidenti Rəcəb Tayyib Ərdoğan, yeni "Çelik Kubbe" inteqrasiya olunmuş hava hücumundan müdafiə sistemini ölkənin müdafiə ehtiyacları baxımından 'bir dönüş nöqtəsi' kimi təsvir etdi" deyərək əlavə edib: "Suriya və Ukraynadakı son münaqişələr, eləcə də İsrailin bu yaxınlarda İrana qarşı hücumları daha yaxşı hava hücumundan müdafiə sistemlərinin inkişafına ehtiyacı artırıb. Prezident həmçinin 2026-cı ildə açılması planlaşdırılan yeni Aselsan istehsal müəssisələrinin də açılışını edib." Xəbərdə Türkiyənin 1974-cü ildə Kipr əməliyyatına cavab olaraq ABŞ tərəfindən tətbiq edilən silah embarqosundan bəri müdafiə sənayesinə böyük investisiyalar yatıraraq silah istehsalında özünü təmin etməyi hədəflədiyi vurğulanıb. İsrail mətbuatının aparıcı saytlarından Times of Israel isə "Ərdoğan, Türkiyənin öz "Çelik Kubbe" hava hücumundan müdafiə sisteminin orduya təhvil verilməsini təriflədi. Prezident, 'son münaqişələr' səbəbindən həyata keçirilən 460 milyon dollarlıq yeni sistemin, 'dostlara güvən, düşmənlərə qorxu verəcəyini' söylədi" ifadələrini işlədərək qeyd edib: "Ərdoğan, Çərşənbə günü ölkənin "Çelik Kubbe" hava hücumundan müdafiə sisteminin ordusuna təhvil verilməsini ölkə üçün bir dönüş nöqtəsi adlandıraraq, regional münaqişələrin Ankaranı müdafiə qabiliyyətlərini artırmağa sövq etdiyini söylədi." O, Türkiyənin bölgədə artan narahatlıqdan təsirləndiyini vurğulayaraq, xüsusilə Suriya lideri Bəşər Əsədin devrilməsindən sonra İsrailin Suriyadakı artan müdaxilələrinə və iyun ayında İran ilə İsrail arasındakı 12 günlük hava müharibəsinə diqqət çəkib, ətrafdakı münaqişələrin havadan gələn təhdidlərə qarşı bu sistemlərin əhəmiyyətini göstərdiyini bildirib. Yunanıstanın iqtisadiyyat nəşrlərindən Financial Report, "Aselsan, yeni müdafiə sənayesi tədqiqat bazasına 1.5 milyard dollar investisiya yatırdı" deyərək, "Türkiyə raket və hərbi sistemlərdə yerli istehsalı gücləndirməyi hədəfləyir" ifadələrinə yer verib. Xəbərdə, "Aselsan, yeni bazanı böyük bir raket proqramı üçün radar, sensor və 'ağıllı' sursatlara yönəlmiş elektronika kimi kritik komponentləri inkişaf etdirmək və istehsal etmək üçün istifadə edəcək" deyilir və şirkətin açılış günü "Çelik Kubbe" sisteminə aid "47 mühüm hissəni Türkiyə ordusuna təhvil verdiyi" qeyd edilib, maliyyə detalları da əlavə olunub: "Bu ilin əvvəlində şirkət, "Çelik Kubbe" sistemi üçün komponentlər istehsal etmək məqsədilə 616 milyon dollarlıq dövlət dəstək paketi əldə etdi. Həmçinin Borsa İstanbul 100 İndeksindəki ən güclü səhmlərdən biri mövqeyindədir. İlin əvvəlindən bəri yüzdə 153 dəyər qazanaraq bazar dəyəri 20 milyard dollara çatdı." Belçika mətbuatından 7sur7, "Prezident Rəcəb Tayyib Ərdoğan, dövlət şirkətləri tərəfindən ordusuna təhvil verilən "Çelik Kubbe" hava hücumundan müdafiə sistemini, son dövrlərdəki böyük regional münaqişələrin kölgəsində, 'Türkiyə üçün bir dönüş nöqtəsi' kimi xarakterizə etdi" ifadələrinə yer verib. Nəşr, Ərdoğanın Türkiyə ətrafındakı münaqişələrin hava təhdidlərini aşkar etmək üçün radar sistemlərinin əhəmiyyətini ortaya qoyduğunu vurğuladığını ön plana çıxarıb. Yayın orqanı, Müdafiə naziri Gülərin bunun silahlı qüvvələrin çəkindiriciliyinə diqqət çəkdiyini bildirərək, "Türkiyə həmçinin 1.5 milyard dollar dəyərində nəhəng bir texnologiya bazası qazandıracaq işləri də başlatdı və bu 'Cümhuriyyət tarixinin müdafiə sənayesində bu günə qədər edilmiş ən böyük tək investisiyası' kimi xarakterizə edildi" qeydini düşüb.

24 saat