Suriya hökuməti ilə Süveyda əyalətindəki yerli silahlı qruplar və nüfuzlu şəxslər arasında atəşkəs razılaşması əldə edildikdən sonra, ordu birlikləri şəhərdən mərhələli şəkildə geri çəkilir. Əyalətdəki hərbi mənbələr İsrail hücumu təhlükəsinin hələ də davam etdiyini bildirir.
Anadolu Agentliyinin (AA) qrupu atəşkəsdən sonra bölgədə ümumi sakitliyin hökm sürdüyünü qeyd edib. Ordu birliklərinin şəhərdən ayrılması AA tərəfindən lentə alınıb.
Süveydada başlayan qarşıdurmalar və İsrailin müdaxiləsi
Suriyanın cənubunda yerləşən Süveyda əyalətində iyulun 13-də Bədəvi ərəb qəbilələri ilə Dürzi silahlı qrupları arasında kiçikmiqyaslı toqquşmalar başlamışdı. Bölgəyə göndərilən təhlükəsizlik qüvvələrinə Dürzi qrupların hücumları nəticəsində onlarla əsgər həlak olmuşdu. Təhlükəsizlik qüvvələri ilə yerli silahlı Dürzi qrupları arasında toqquşmaların genişlənməsindən sonra tərəflər arasında atəşkəs əldə edildi. Lakin bu atəşkəs qısa müddətdə pozuldu və İsrail ordusu Suriya təhlükəsizlik qüvvələrini hədəf alan hücumlar həyata keçirdi.
Son olaraq, İsrail hava qüvvələri Suriya Prezident iqamətgahını, Baş Qərargahı və Müdafiə Nazirliyini hədəf aldı. Süveydada hökumət ilə yerli qruplar arasında atəşkəs yenidən təmin olunduğu halda, İsrail qırıcıları Şam və Dəraya hücumlar etdi. Bu toqquşmalar və hücumlarda yüzlərlə insanın həyatını itirdiyi təxmin edilir.